Elordada koronavırýske qarsy vaktsınalaý qalaı júrgizilýde
NUR-SULTAN. QazAqparat – Nur-Sultan qalalyq qoǵamdyq densaýlyq saqtaý basqarmasynyń basshysy Tımýr Muratov koronavırýsqa qarsy vaktsına alatyn patsıentterdiń baǵyt-baǵdaryn jarııa etti, dep habarlaıdy QazAqparat tilshisi.
«Emhananyń kireberisinde egý kabınetine kórsetilgen baǵdarlar ornatylǵan. Tirkeý bólmesinde patsıentti vaktsına alý úshin dárigerge jazaly jáne KVI-ǵa qarsy vaktsınany alý úshin is-áreket algorıtmin túsindiredi», - dedi ol Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, osydan keıin dáriger patsıenttiń dene qyzýyn, saıýratsııa, júrek qaǵysynyń jıiligin, qan qysymyn, tynys alý jáne júrek qan-tamyrlarynyń aýskýltatsııasyn jáne tamaǵyn tekseredi. Sodan soń orta medıtsınalyq qyzmetker patsıentti kezekpen emshara bólmesine shaqyrady jáne vaktsınatsııa jasalady.
«Vaktsınatsııadan keıin patsıentke «KVI-ǵa qarsy vaktsına egildi. Medıtsınalyq baqylaý ýaqyty - 30 mınýt!» degen beıdj taratylady. Medıtsınalyq qyzmetkerdiń baqylaýymen emhananyń kútý zalynda 30 mınýt mindetti túrde bolý qajettiligi eskertiledi. Naýqas kútý zalyna jiberiledi jáne 30 mınýt kútedi. 30 mınýttan keıin medıtsınalyq maman patsıenttiń densaýlyq jaǵdaıyn baǵalaıdy jáne beıdjdi qaıta alyp, ony úıine jiberedi. Ýchaskelik dáriger 3 kún ishinde naýqasqa qashyqtyqtan baqylaý júrgizedi. 21-kúni patsıent vaktsınanyń 2-shi dozasyn alýǵa keledi», - dedi Tımýr Muratov.
Aıta keteıik, búgin Qazaqstanda koronavırýs ınfektsııasyn juqtyrý jáne taratý táýekeli joǵary sanattardy koronavırýsqa qarsy vaktsınalaý bastaldy. Qazaqstanda vaktsına erikti túrde salynady.
Elordadaǵy №6 qalalyq emhanada QR Densaýlyq saqtaý vıtse-mınıstri – Bas memlekettik sanıtar dáriger Erlan Qııasov pen Densaýlyq saqtaý vıtse-mınıstri Ajar Ǵınııat koronavırýsqa qarsy vaktsına saldyrdy.
