Elordada koronavırýsqa shaldyqqan analar 12 deni saý náresteni dúnıege ákeldi
NUR-SULTAN. QazAqparat – Elordada koronavırýspen aýyrǵan analar 12 deni saý náresteni dúnıege ákeldi. Bul týraly Ortalyq kommýnıkatsııalar qyzmetinde Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova málim etti, dep habarlaıdy QazAqparat tilshisi.
«Biz barlyq usynystar men berilgen keńesterdi oryndaýdy suraımyz. Bul barsha turǵyndar úshin qajet. Osy jaǵdaıǵa qaramastan, ómir jalǵasýda. Elordada koronavırýs juqtyrǵan analar 12 deni saý náresteni dúnıege ákeldi. Bul óz kezeginde bizdiń medıtsına qyzmetkerleriniń óte úlken ári qarqyndy jumysynyń nátıjesi ekenin atap ótken jón», - dedi Sáýle Qısyqova.
Budan buryn habarlanǵandaı, elordada vırýs juqtyrǵan jalpy 2 620 adam anyqtaldy. Onyń ishinde 270-i bala . 1 829 naýqas nemese 70 paıyzy jazylyp shyqty. Ókinishke qaraı, tolyq kólemde júrgizilgen medıtsınalyq kómekke qaramastan, 14 adam qaıtys boldy.
«Búginde koronavırýs ınfektsııasymen 730 naýqas aýrýhanada jatyr. Olardyń ishinde 48-iniń jaǵdaıy aýyr, sonyń arasynda 18 naýqas óte aýyr jaǵdaıda. Olardyń ókpeleri jasandy jeldetý apparatyna qosylǵan», - dedi S. Qısyqova.
