Elordada koronavırýsqa qarsy arnaıy jasaqtalǵan emhanalar burynǵy jumysyna oralady

NUR-SULTAN. QazAqparat – Nur-Sultan qalasynda COVID-2019 indetine qarsy arnaıy jasaqtalǵan medıtsınalyq uıymdar burynǵy jumys baǵytyna qaıtyp kelip jatyr. Bul týraly Nur-Sultan qalalyq densaýlyq saqtaý basqarmasynyń basshysy Sáýle Qısyqova málim etti, dep habarlaıdy QazAqparat tilshisi.

«Keıbir medıtsınalyq uıymdardyń jumysyn qaıta qalpyna keltirý máselesi sheshilip jatyr. Olar koronavırýs ınfektsııasynyń taralýyna jol bermeý maqsatynda COVID-2019 indetine qarsy arnaıy jasaqtalǵan bolatyn», - dedi Sáýle Qısyqova OKQ-da ótken baspasóz máslıhatynda.

Basqarma basshysynyń aıtýyna qaraǵanda, astana halqy qazir qalypty ómirge oralýda.

«Koronavırýs ınfektsııasyna baılanysty buǵan deıin engizilgen shekteý sharalary aqyryndap alyna bastaldy. Birqatar nysandy asha otyryp, biz qalyptasqan qazirgi ahýaldy testen ótkizip jatyrmyz. Densaýlyq saqtaý júıesi jaǵdaıdy baqylap, testilep, qadaǵalaýdy úırense, qatań karantın rejıminen shyǵýǵa bolady. Naýqastardy qabyldaıtyn oryndar elordada jetkilikti. Qaladaǵy aýrýhanalardyń bárinde koronavırýsty anyqtaıtyn provızorlyq ortalyq ashyldy», - dedi ol.

Aıta ketsek buǵan deıin Sáýle Qısyqova qaladaǵy epıdemıologııalyq jaǵdaıdy baıan etken bolatyn.