Elordada koronavırýsqa baılanysty balalardyń 80 paıyzy balabaqshaǵa barmaǵan
NUR-SULTAN. QazAqparat - Mektepke deıingi mekeme basshylarynyń málimetinshe, balabaqshaǵa barmaǵan balalardyń úlesi 79,9%-dy qurap otyr. Bul týraly Nur-Sultan qalasy ákimdiginde elde engizilgen tótenshe jaǵdaı boıynsha QR Prezıdentiniń tapsyrmalaryn júzege asyrý aıasynda ótken onlaın brıfıngte aıtyldy, dep habarlaıdy QazAqparat tilshisi.
«Elordadaǵy balabaqshalar shtattyq rejımde jumys istep jatyr. Balabaqshada jumys isteıtinderdiń jalaqysy tolyǵymen saqtalady. Balalardyń balabaqshaǵa kelý tártibi erkin bolady. Balabaqshaǵa balalar az kelgen jaǵdaıda olar shaǵyn topqa biriktiriledi. Pedagogtar saǵattyq júktemeni saqtaı otyryp, ádistemelik ispen aınalysa alady», - deıdi Nur-Sultan qalasy bilim basqarmasynyń basshysy Sholpan Qadyrova.
Ol ınfektsııanyń taralýyna jol bermeý úshin profılaktıkalyq sharalar kúsheıtilgen rejımde júrgizilip jatqanyn aıtty.
«Medıtsınalyq qyzmetkerler kún saıyn tańerteń balalardyń dene qyzýyn ólshep, aýrý belgileri bar-joǵyn tekserýde. Dezınfektsııa jasaıtyn zattar jetkilikti. Ata-analarǵa ártúrli ınfektsııanyń aldyn alý úshin balalaryn úıde ustaýdy usynamyz. Balabaqshaǵa barmaǵan balalardyń orny saqtalady. Mektepke deıingi mekeme basshylarynyń málimetinshe, balabaqshaǵa barmaǵan balalardyń úlesi 79,9%-dy qurap otyr», - deıdi ol.
