Elordada koronavırýs juqtyrǵandarmen qarym-qatynasta bolǵandar naýqastardan 5 ese kóp
NUR-SULTAN. QazAqparat - Elordada koronavırýs juqtyrǵandarmen qarym-qatynasta bolǵandar naýqastardan 5 ese kóp. Bul týraly Habar-24 telearnasynyń tikeleı efırinde Nur-Sultan qalasynyń ákimi Altaı Kólginov aıtty, dep habarlaıdy QazAqparat tilshisi.
«Koronavırýs juqtyrǵandardyń sany 1 686 adam bolsa, olarmen qarym-qatynasta bolǵandar 5 ese, sonymen qatar úı karantıninde otyrǵan adamdar sany 4 ese kóp. Sondyqtan vırýs óte qaýipti», - dedi elorda ákimi.
Osyǵan oraı qala basshysy elorda turǵyndaryn sanıtarlyq normalardy qatań saqtaýǵa úndedi.
«Vırýs óte qaýipti bolǵandyqtan sanıtarlyq normalardy qatań saqtaý qajet. Bizdiń statıstıkamyzǵa sáıkes, indet juqtyrǵandardyń 40 paıyzy 30 jasqa deıingi jastar, al 35 paıyzy 30 ben 50 aralyǵyndaǵy adamdar eken. Demek, vırýs jas talǵamaıdy degen sóz. Sondyqtan biz ózimizdi, jaqyndarymyzdy qorǵaýǵa tıispiz», - dedi Altaı Kólginov.
