Elordada koronavırýs juqtyrǵandardy aýrýhanaǵa jatqyzý tártibi túsindirildi
NUR-SULTAN. QazAqparat –Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qısyqova koronavırýspen aýyrǵandardy aýrýhanaǵa jatqyzý tártibin túsindirdi, dep habarlaıdy QazAqparat tilshisi.
«Eger naqty koronavırýs ınfektsııasyna toqtalsaq, aýmaqtyq emhanalar sheshimi boıynsha jedel járdem aýrýhanaǵa jetkizedi. KVI tirkelgen jaǵdaıda aýmaqtyq emhanalar osy epıdemıologııalyq oshaqty baqylaýǵa alyp, indettiń sımptomsyz nemese sımptomdy ekenin anyqtaıdy», - dedi S. Qısyqova Ortalyq kommýnıkatsııalar qyzmetinde.
Onyń sózinshe, emhanadan tys turǵyn ózi habarlassa, onda joǵary qaýipti eskere otyryp, jedel járdem stantsııasynyń qyzmetkerleri patsıentti aýrýhanaǵa jetkizedi.
«Eger qoldarynda naqtylanǵan analız bolmasa, aýrýhanaǵa jetkizedi, provızorlyq statsıonarǵa konsýltatsııaǵa alyp barady. Onda barshasyna koronavırýs ınfektsııasy boıynsha test jasalyp, adamdardyń aǵzasy tekserýden ótedi. Sol jerde aýrýhanaǵa jatqyzý máselesi sheshiledi. Infektsııa naqtylansa, naýqas ınfektsııalyq statsıonarǵa aýystyrylady», - dedi Sáýle Qısyqova.
Aıta keteıik, Sáýle Qısyqova koronavırýs ınfektsııasyn juqtyrǵan adamdar birinshi kezekte ne isteý kerektigin túsindirdi.
Onyń sózine qaraǵanda, dene qyzýy 38 gradýstan joǵary bolsa, 500 mıllıgramnan paratsetamol jáne kúnine bir ret aspırın (150 mıllıgram) qabyldaýy kerek.
