Elordada koronavırýs juqtyrǵan júkti áıelderge qaı nysanda qyzmet kórsetiledi
NUR-SULTAN. QazAqparat – Eresekter men balalarǵa jedel medıtsınalyq kómek tolyq kólemde júrgizilip jatyr. Bul týraly Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qısyqova málim etti, dep habarlaıdy QazAqparat tilshisi.
«Júkti áıelderge medıtsınalyq kómek 360 orynǵa arnalǵan eki perınataldy ortalyqta kórsetiledi. Sonymen qatar, koronavırýs ınfektsııasyn juqtyrǵan júkti áıelderge 185 oryny bar №2 perınataldy ortalyq negizinde (Covid-ortalyqta) medıtsınalyq kómek kórsetiledi», - dedi S. Qısyqova Ortalyq kommýnıkatsııalar qyzmetinde.
Onyń sózine qaraǵanda, balalar aýrýhanalary burynǵy rejımde tolyq jumys istep tur.
Aıta keteıik, basqarma basshysy elordada jedel járdem qyzmetine júkteme artqanyn málim etti.
«Aptasyna turǵyndardan 28 myń ótinish kelip túsken. Sońǵy táýlikte bul kórsetkish 4,5 myńǵa deıin jetti. Qyzmet kórsetilgen shyqyrýlardyń sany 18 myńǵa jýyqtap, keshe 2,8 myń boldy. Sonyń ishinde aptasyna koronavırýs juqpasyna baılanysty 4 438 qońyraý shalyndy. Keshe 1300 shaqyrtý boldy», - dedi S. Qısyqova Ortalyq kommýnıkatsııalar qyzmetinde.
Budan buryn habarlanǵandaı, maýsym aıynyń orta kezinde Elordada KVI juqtyrǵan júkti áıelder bosanatyn jeke perzenthana ashylady.
