Elordada koronavırýs juqtyrǵan adam turǵan úı karantınge jabyla ma
NUR-SULTAN. QazAqparat - Elorda ákiminiń orynbasary Baqtııar Máken «Elordada koronavırýs juqtyrǵan adam turǵan turǵyn úı oqshaýlana ma?» degen suraqqa jaýap berdi, dep habarlaıdy QazAqparat tilshisi.
«Karantın júrgizý úshin turǵyn úıdi oqshaýlaý - durys emes, sebebi qandaı da bir dıagnozy anyqtalǵan naýqas jedel túrde aýrýhanaǵa jatqyzylady», - dedi Bahtııar Máken Ortalyq kommýnıkatsııalar qyzmetinde ótken brıfıngte.
Onyń aıtýynsha, adam ózin nashar sezinip, jedel járdem shaqyrsa, birden aýrýhanaǵa jatqyzylady.
«Eger ol týystarymen nemese turǵyn úıdegi adamdarmen qarym-qatynasta bolsa, olar karantınge jatqyzylady», - deıdi ol.
Aıta keteıik, keshe koronavırýs juqtyrǵan adam turǵan Almatydaǵy «Suńqar» turǵyn úıi oqshaýlanǵan bolatyn.
