Elordada koronavırýs júkti áıelder men balalar arasynda jıileı tústi

NUR-SULTAN. QazAqparat – Nur-Sultan qalasynda júkti áıelder men balalar arasynda COVID-19-ǵa shaldyǵý jıi baıqalýda. Bul týraly qalalyq qoǵamdyq densaýlyq saqtaý basqarmasy basshysynyń orynbasary Álııa Rústemova ákimdikte onlaın ótken baspasóz máslıhatynda málimdedi, dep habarlaıdy QazAqparat tilshisi.

«Búginde ınfektsııalyq statsıonarda 748 patsıent em alyp jatyr. Ondaǵy tósek-orynnyń 60 paıyzy bos emes. Qańtardyń basynda kúnine ınfektsııalyq statsıonarǵa kúnine 18 adam tússe, sońǵy táýlikte onyń sany 215-ke jetti. Al reanımatsııada 34 adam jatyr. Elordadaǵy epıdjaǵdaıdyń nasharlaı túsýine baılanysty 4 qalalyq aýrýhanada qosymsha tósek-oryn ázirlendi. Onyń ishinde akýsherlik bólimshelerde koronavırýsqa shaldyqqan júkti áıelder úshin 150 tósek-oryn daıyndaldy», - dedi Á. Rústemova.

Onyń aıtýynsha, qazir qalada jańadan 1240 tósek-oryn qaıta shyǵaryldy.

«Jaǵdaı ásirese júkti áıelder men balalar arasynda ýshyǵyp tur. Qazirgi ýaqytta 338 júkti áıel KVI-ge shaldyǵyp otyr. Olardyń 215-i statsıonarda emdelip jatyr. Sondaı-aq, statsıonar jaǵdaıynda 126 bala atalǵan indet túrinen em alyp jatyr. Ókinishke qaraı, kóp turǵyndar indet shtamynyń jańa túrine asa mán berip jatqan joq. Sáıkesinshe saqtyq sharalarynyń oryndalmaýy indettiń órshýine alyp kelip otyr», - deıdi ol.