Elordada koronavırýs sımptomy joq tasymaldaýshynyń jaǵdaıy onlaında baqylanady
Nur Sultannyń medıtsına qyzmetkerleri naýqastardyń densaýlyǵyn onlaın baqylap, koronavırýstyń asımptomatıkalyq tasymaldaýshylaryna barlyq másele boıynsha keńes beredi. Olar úı karantıninde bolýy kerek.
Elorda ákimi Altaı Kólginov barlyq qalalyq jáne jeke klınıkalardyń bas dárigerlerimen, aýrýhanalardyń, taldaý ortalyqtarynyń basshylarymen jáne qalanyń bas sanıtarlyq dárigerimen onlaın-kezdesý ótkizdi.
«Qazir kóptegen ótinishter kelip túsýde, sonyń ishinde iKomek ortalyǵy da bar. Turǵyndar, úıde karantınde turǵan jáne aýrý belgileri bar adamdardyń da suraqtary bar. Ár patsıentpen jeke jumys isteý kerek. Buǵan biz jasaǵan elektrondy karantındik qosymshanyń kómegi zor. Biraq birqatar shaǵym bar. Shaǵymdardyń kópshiligi № 6, 10 emhanaǵa jáne «Shıpager» otbasylyq densaýlyq ortalyǵyna kelip túsedi. Dárigerler Zoom arqyly koronavırýstyń asımptomatıkalyq tasymaldaýshylarymen onlaın kezdesý ótkizýi kerek. Suraqtarǵa jaýap berip, olardyń densaýlyǵyn baqylap, patsıentterdiń ózin-ózi oqshaýlaý rejımin ustanýyn qamtamasyz etýi kerek. Naýqaspen keri baılanysy úshin basqa baılanys arnalaryn da qoldaný múmkindigi bar. Sımptom paıda bolǵan jaǵdaıda naýqas aýrýhanaǵa jatqyzylýy tıis. Vırýs eshqaıda ketken joq, sondyqtan qatań sanıtarlyq normalardy saqtaý kerek. Іndettiń jańa tolqynyna daıyn bolýymyz kerek», – dedi elorda ákimi Altaı Kólginov.
Elordanyń medıtsınalyq mekemeleri qajetti dári-dármekpen tolyq qamtamasyz etilgen, barlyq aýrýhanada jeke qorǵanys quraldary, dezınfektsııalyq týnnel, dárigerlik ambýlatorııalarda sensor termometr ornatylǵan. Bul ǵımaratqa kirgen adamdardyń barlyǵynyń temperatýrasyn alystan ólsheýge múmkindik beredi.
Elorda ákimi Altaı Kólginovtiń ókimimen emhanalar men aýrýhanalar aýmaǵyndaǵy dezınfektsııalyq týnnelder men teplovızorlar sany artady. Jalpy, Nur-Sultanda 2644 koronavırýs juqtyrý jaǵdaıy tirkeldi. 13 maýsymdaǵy jaǵdaı boıynsha 1 893 naýqas (70%) emdelip shyqty. Aýrýhanalarda 700-den astam adam emdelýde, olardyń jartysynda pnevmonııa dıagnozy rastaldy.
oronavırýstyń naýqastarǵa zalaly túbegeıli joılyp ketpeıdi. Infektsııa tek ókpege ǵana áser etpeıdi – tindik fıbroz túrinde oshaqtar paıda bolady, sonymen qatar baýyrǵa, búırekke, júrekke jáne mıǵa áser etýi múmkin. Qalalyq qoǵamdyq densaýlyq saqtaý basqarmasynyń basshysy Sáýle Qısyqova sanıtarlyq normalardy qatań saqtaý kerek ekenin atap ótti. «Mine, birneshe aı boıy medıtsına qyzmetkerleri qarqyndy rejımde jumys istep keledi. Azamattar tek ózderine ǵana emes, dárigerlerge de kómektesýi kerek. Nemquraılylyq densaýlyqqa zııan tıgizbeýi kerek. Sanıtarlyq normalardy saqtamaý qalalyq aýrýhanalardyń tolyp ketýine jáne bul dárigerler ár naýqasqa ýaqtyly kómek kórsete almaýyna ákelýi múmkin. Olardyń ishinde sizdiń jaqyndaryńyz da bolýy múmkin. Tipti deni saý jáne jas adamdar da qarsy tura almaıtyn asa qaýipti ınfektsııaǵa saqtyqpen qaraý kerek», - dedi Sáýle Qısyqova.