Elordada Qorqyt ata atyndaǵy kóne aspaptar ansambliniń kontserti ótedi
ASTANA. 29 mamyr. QazAqparat - 29 mamyr kúni saǵat 18:30-da Nazarbaev ortalyǵynyń kontsert zalynda Qorqyt ata atyndaǵy kóne aspaptar ansambliniń kontserti ótkiziledi.
Ansambldiń jetekshisi - belgili qobyzshy, Qazaqstannyń eńbek sińirgen qaıratkeri Álqýat Qazaqbaev. Ansambldiń negizi 2003 jyly qurylǵan «Tilep» qobyzshylar kvartetinen bastaý alady. Kvartet elimizde ǵana emes, shet elderde de ónerimen tyndarmandaryn tánti etken bolatyn. Atap aıtqanda, Avstralııa, Ispanııa, Reseı, Japonııa, Túrkııa, Iordanııa, Frantsııa, Shveıtsarııa, AQSh elderinde halqymyzdyń qobyz ónerin nasıhattap, bıik deńgeıde óner kórsetti.
Búginde ujym qanatyn keńge jaıyp, ansambl dárejesine kóterildi. Ansambl músheleri - respýblıkalyq jáne halyqaralyq baıqaýlardyń laýreattary: Gaýhar Qylyshbekova, Damır Ábishev, Áıgerim Ersaıynova, Aıymgúl Orynbaeva sekildi ónerpazdar qazaqtyń birneshe aspabyn meńgergen kásibı mamandar.
Óner keshine qazaq ónerpazdarymen birge Túrkııa, Qyrǵyzstan elderiniń óner maıtalmandary qatysady. Keshti kórnekti memleket jáne qoǵam qaıratkeri, ulttyq óner janashyry Myrzataı Joldasbekov ashady dep kútilýde.
Keshtiń rejısseri - Qazaqstannyń eńbek sińirgen qaıratkeri Sáýlebek Asylhanuly. Óner keshin tamashalaýǵa zııaly qaýym, depýtattar, qala qonaqtary men ónersúıer kópshilik shaqyrylǵan.
