Elordada kórkem galereıa ashylady

NUR-SULTAN. QazAqparat – Nur-Sultan qalasynda bıyl kúzde jańa kórkem galereıa ashylady. Óner ordasyn tanymal sýretshi, galerıst, «Qulanshy» zamanaýı óner ortalyǵynyń kýratory Leıla Mahat jetekshilik etpek, dep QazAqparat tilshisi.

Táýelsizdik saraıynda kórkem galereıa ashý ıdeıasy týraly Astana Venue Management kompanııasynyń basshysy Málik Hasenov málim etti.

«Kórkem galereıanyń ashylýy bıyl qyrkúıek aıyna josparlanyp otyr. Oǵan qatysty qala ákimi Altaı Kólginov pen Leıla Mahat kezdesý de ótkizdi. Bul óner álemindegi aıtýly oqıǵa bolmaq. Búginde elordada kartına galereıasy joq. Osy oraıda ónerdiń bul túrin qoldaýda galereıa ashý úlken qadam bolmaq. Sondaı-aq, turaqty kórmeler de uıymdastyrylmaq», - dedi M. Hasenov.

Jańa óner zalyna jetekshilik etetin Leıla Mahat onyń tujyrymdamasyn oılastyryp qoıǵanyn aıtty.

«Galereıanyń jaı ǵana kórme ótkizetin keńistik bolǵanyn qalamaımyz. Onyń ınteraktıvti bolǵany jón. Úlken óner zalynda kartınalardyń ilinip, ınstallıatsııa qoıylǵanyn kórgen kelýshiler ózderin sonyń bir bóligi retinde sezinýi tıis. Sol úshin de kórermendermen qarym-qatynas ornatý maqsatynda biz túrli formadaǵy stýdııalardy oılastyratyn bolamyz. Óner ol jaı ǵana qaraı salatyn nysan emes, ol adamnyń ajyramas bóligi. Odan bólek, sheberlik sabaǵyn da ótkizý josparda bar. Adamdy ónerge bala kúninen baýlyǵan jón, erte baýlysa onyń nátıjesin de erterek kórýge bolady», - deıdi ol.

Buǵan deıin elordadaǵy Táýelsizdik saraıynda balalar men jastarǵa arnalǵan damytý ortalyǵy ashylǵanyn habarlaǵan bolatynbyz.