Elordada Qorǵaljyn men Şýchınskige baratyn eki jol ashyldy
NUR-SULTAN. QazAqparat – Elordadan Qorǵaljyn aýdany jáne Şýchınsk qalasyna baratyn eki jolda kólik qozǵalysy ashyldy, dep habarlaıdy QazAqparat qalalyq TJD-ǵa silteme jasap.
«12 qańtarda saǵat 21:30-de aýa raıynyń jaqsarýyna baılanysty «Nur-Sultan qalasy - Qorǵaljyn» (Aqmol kentinen Qorǵaljyn qoryǵyna deıingi 18-180 shaqyrym aralyǵy) tas joly men «Nur-Sultan qalasy –Petropavl qalasy» (Nur-Sultan qalasynan Şýchınsk qalasyna deıingi 18-231 shaqyrym aralyǵynda) tas joly barlyq kólik túrleri qozǵalysy úshin ashyldy», delingen habarlamada.
Eske sala ketsek, aýa raıynyń qolaısyzdyǵyna baılanysty (qar, boran, joldyń kórinbeýi) Aqmola, Qostanaı, Qaraǵandy, Pavlodar, Soltústik Qazaqstan oblystaryndaǵy birqatar jolda kólik qozǵalysy shekteldi.
Sondaı-aq , Qaraǵandy oblysynyń aýmaǵynda barlyq ishki baǵyt boıynsha kólik qozǵalysy toqtatyldy.
