Elordada koreıalyq ónerpazdardyń mádenı is-sharalary ótedi

ASTANA. KAZINFORM – Osy jaz ben kúzde astanalyqtar men elorda qonaqtary káris halqynyń mádenı is-sharalaryn tamashalaı alady. Bul týraly Qazaqstandaǵy Koreıa Respýblıkasynyń Tótenshe jáne Ókiletti elshisi Chjo Te-ık málim etti.

«2022-2023 jyldar Koreıa Respýblıkasy men Qazaqstan Respýblıkasy arasyndaǵy ózara mádenı almasý jyly boldy. Eki jyldyń ishinde ekijaqty mádenı qarym-qatynas tereńdeı tústi. Atap óter bolsaq, operalyq kontsertter, koreı dástúrli mýzykasy men thekvondo boıynsha qoıylymdar, sondaı-aq eki eldiń mádenı jaqyndasýyna yqpal etken sán kórsetilimderi ótkizildi», - dedi Chjo Te-ık elordada «Óner retinde jandanǵan Hanbok» atty kórmeniń ashylý saltanatynda.

Sondaı-aq, elshi myrza eki el arasyndaǵy mádenı qarym-qatynas tendentsııasyn jalǵastyrý úshin elshilik pen Koreı mádenı ortalyǵy bıyl birqatar is-shara ótkizetinin aıtty.

«Maýsym aıynda «K-pop Cover Dance Champion» bı festıvali ótedi, al shildede «Astana Comic Con» festıvaline koreı komıksteri qatysady. Tamyz aıynda «Astana Opera» teatrynda Koreıa Respýblıkasynyń ulttyq zamanaýı bı kompanııasy, al qazan aıynda dástúrli koreı bı toby óner kórsetedi. Elshilik pen Koreı mádenı ortalyǵy kópshilikke arnalǵan jáne mádenı is-sharalardy usyna otyryp, barshańyzdy asyǵa kútedi», - deıdi ol.