Elordada Koreıa Respýblıkasy elshiliginiń jańa ǵımaraty ashyldy
Saltanatty sharaǵa Amerıka Qurama Shtattary, Polsha Respýblıkasy, Nıderlandy Koroldigi sııaqty dıplomatııalyq mıssııalar men halyqaralyq uıymdardyń basshylary, Qazaqstannyń Memlekettik organdary men mınıstrlikteriniń ókilderi, Nur-Sultan qalasyndaǵy koreı dıasporasy men BAQ ókilderi qatysty.
Saltanaty sharada Koreıa Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Kım Desık myrza men QR Syrtqy ister mınıstrliginiń Azııa jáne Afrıka departamentiniń dırektory Erjan Muqash quttyqtaý sóz sóıledi.
Erjan Muqash elshilik ujymyn jańa ǵımarattyń ashylýymen quttyqtap, olarǵa tabys, sondaı-aq eki el arasyndaǵy ári qaraı jemisti yntymaqtastyq tiledi.
Koreıa Respýblıkasynyń Tótenshe jáne ókiletti elshisi Kım Desık bes qabatty ǵımarattyń qurylysy eki jylǵa sozylyp, jeltoqsan aıynda aıaqtalǵandyǵyn aıtty. Ol jańa ǵımarattyń tusaýkeserin 24 shildede ótkizýdi jón kórgenderin, Qazaqstan men Koreıa arasyndaǵy strategııalyq áriptestiktiń 10 jyldyǵyn merekeleý aıasyndaǵy is-sharanyń sımvoldyq mánin atap ótti.
«Belgili bir elde Elshiliktiń óz ǵımaratynyń bolýy, onyń elshilik qyzmetkerlerine jáne osy eldegi otandastarǵa qyzmet etý maqsatymen shektelmeıdi, sondaı-aq olardyń eli men qabyldaýshy el arasyndaǵy qarym-qatynas qanshalyqty berik ekendigin kórsetedi», - dedi Kım Desık.
Shara barysynda qonaqtarǵa qazaqstandyq jáne koreı mýzykanttary men bıshileriniń qatysýymen kontsert qoıyldy.
