Elordada kóptegen saýda oryndary sanıtarlyq talaptardy saqtamaıtyny anyqtaldy – qoǵamdyq baqylaý
NUR-SULTAN. QazAqparat – Nur-Sultan qalasyndaǵy saýda úıleri men bazarlarda sanıtarlyq talaptardyń oryndalý barysyna qoǵamdyq baqylaý júrgizilýde, dep habarlaıdy QazAqparat tilshisi.
«Búgin elordadaǵy saýda úıleri men bazarlardyń sanıtarlyq normalardy oryndaýyna qoǵamdyq baqylaý júrgizý jumysy bastaldy. Alǵashqy baqylaýdy «Artem» saýda úıinen bastadyq. Sanıtarlyq talaptarǵa sáıkes, bazarlar saǵat 17:00-de jabylýy tıis. Al qazir mine, saǵat 17:00 boldy, bazar áli jumys istep tur. Sonymen qatar, kópshilik oryndarda maska taǵý rejıminiń saqtalýyn da tekseremiz. Máselen, keıbir adamdar maskany durys ttaqpaıdy, ıegine ilip qoıady. Ol durys emes. Kelesi másele ara qashyqtyq, erejege sáıkes satýshy men satyp alýshynyń arasy kem degende 2 metr bolýy tıis, baıqaǵanymyzdaı bul ereje saqtalmaǵan», - dedi Respýblıkalyq qoǵamdyq baqylaý úılestirýshisi Saıda Taýkeleva reıd barysynda.
Qoǵamdyq baqylaý ókiliniń málimdeýinshe, monıtorıng nátıjesi quzyrly organdarǵa jiberiledi.
«Sonymen qatar sanıtarlyq talaptardyń negizgi tarmaqtarynyń biri saýda úıi nemese bazar ishindegi adam syıymdylyǵynyń 30%-dan aspaýy. Bul jerden kórip turǵanymyzdaı kórsetkish normadan áldeqaıda joǵary. Osy oraıda biz oryndalmaǵan sanıtarlyq talaptardy anyqtap, ony quzyrly organdarǵa jiberetin bolamyz. Odan ári sheshimdi tıisti mekemeler ózderi qabyldaıdy. Bizdiń maqsat – jaǵdaıdy óz kózimizben kórip, monıtorıng júrgizý. Biz bul jerge syn aıtyp, eskertý jasaý úshin kelgen joqpyz, mindet táýelsiz sarapshy retinde bolǵan isti bolǵandaı baıandap berý» - dedi ol.
Onyń aıtýynsha, qoǵamdyq baqylaý qalanyń basqa da saýda úıleri men bazarlaryna da júrgiziledi.
«Taǵy bir aıtyp ótetin jaıt, biz saýda úıiniń basshylyǵyn aldyn ala habardar etpeımiz. Sebebi túsinikti olar daıyndalmaýy kerek. Táýelsiz qoǵamdyq baqylaýdy obektıvti túrde ótkizip, shynaıy monıtorıng júrgizýimiz qajet. Sondyqtan da aldaǵy jumys kúnimizdiń kestesi daıyn, oǵan sáıkes biz 3 bazar jáne 2 saýda úıin aralaıtyn bolamyz, - dedi S. Taýkeleva.
