Elordada kópsalaly sport alańy ashyldy
ASTANA. Shildeniń 1-i. QazAqparat - Búgin Astana qalalyq TJD «Órt sóndirý jáne apattyq-qutqarý jumystary qyzmeti» MM-niń №3 mamandandyrylǵan órt sóndirý bóliminiń aýmaǵynda sport alańynyń ashylý rásimi ótti.
Elorda kúni merekesi qarsańynda paıdalanýǵa berilip otyrǵan alańnyń ashylý rásimine QR Tótenshe jaǵdaılar vıtse-mınıstri Janbolat Smaılov, «QazMunaıGaz» ulttyq kompanııasy» AQ-nyń bıznesti qoldaý jónindegi bas menedjeri S.Elshibekov qatysty.
Shara barysynda órt sóndirý qyzmetiniń mamandaryn quttyqtaǵan vıtse-mınıstr Memleket basshysynyń bastamasymen elordany damytý sheńberinde nysannyń qoldanysqa berilý mańyzdylyǵyn jáne salaýatty ómir saltyn, dene tárbıesi men sportty dáripteý qajettigin basa aıtty.
«QazMunaıGaz» ulttyq kompanııasynyń demeýshiligimen boı kótergen sporttyq nysan qurylysyna paıdalanylǵan jaraqatqa qarsy jáne aıazǵa tózimdi jamylǵy jazdy kúnderi shaǵyn fýtbol, voleıbol, basketbol, tennıs, al qysty kúnderi hokkeı men mánerlep syrǵanaýdan saıystar júrgizýge múmkindik beredi. Fýtbol alańyndaǵy jasandy kógal halyqaralyq, onyń ishinde FIFA, UEFA talaptaryna saı bolsa, tennıs alańynyń sıntetıkalyq jamylǵysynyń materıaly Ýımbldon oıyn alańyndaǵy jabyndyǵy sáıkes keledi.
