Elordada kópqabatty úılerdiń balkonyna 300-den astam tý ilindi
ASTANA. QazAqparat – «Astana jastary» jastar resýrstyq ortalyǵynyń volonterleri «chellendj» uıymdastyryp, qala boıynsha 300-den astam elimizdiń kók týyn ildi, dep habarlaıdy QazAqparat tilshisi.
Kópqabatty úılerdiń balkonyna tý ilý aktsııasy jyl saıyn elimizde 4 maýsymda atap ótiletin Memlekettik rámizder kúni merekesine arnaldy.
«Búkil aýdandarǵa 330 tý berildi. Onyń 150-i Saryarqa aýdanyna bólindi. Qala boıynsha tý ilý jumysyna shamamen 50 adam qatysty», - dep málim etti Astana qalalyq jastar saıasaty máseleleri basqarmasynyń baspasóz qyzmetinen.
Uıymdastyrýshylardyń atap ótýinshe, is-sharanyń maqsaty – qala turǵyndaryna merekelik kóńil-kúı syılaý, Otanǵa, memlekettik rámizderge degen súıispenshilik pen mahabbat senimderin nyǵaıtý.
«Qarsylyq tanytqandar bolǵan joq, turǵyndar bul chellendjdi óte jaqsy qabyldady. Bizdiń basty maqsatymyz oryndaldy dep oılaımyz», - dedi basqarma baspasóz hatshysy Ánel Mansur.
Aıta keteıik, búgin memlekettigimizdiń sımvoldarynyń qabyldanǵanyna 31 jyl tolyp otyr. 2007 jyly 4 maýsymda qabyldanǵan «Qazaqstan Respýblıkasynyń Memlekettik rámizderi týraly» Konstıtýtsııalyq Zańǵa sáıkes jyl saıyn 4 maýsym Qazaqstan Respýblıkasynda Memlekettik rámizder kúni retinde merekelenedi.
