Elordada kópqabatty turǵyn úıde órt shyqty

ASTANA.KAZINFORM – Astanadaǵy Saraıshyq aýdanynda ornalasqan Q.Ázerbaev kóshesindegi 10 qabatty turǵyn úıde órt shyqty.

Tótenshe jaǵdaılar mınıstrliginiń málimetinshe, alǵashqy órt sóndirý bólimsheleri oqıǵa ornyna jetken kezde 7-qabattaǵy páterden órt anyqtalǵan. Sondaı-aq kireberisti tútin basqan.

– Órt sóndirý qondyrǵylary dereý iske qosyldy, órtti tolyq sóndirý úshin barlyq shara qabyldanyp, sý úzdiksiz jetkizilip jatyr, – delingen habarlamada.

Sonymen qatar oqıǵa ornynda jedel shtab qurylyp, órtti sóndirý birneshe ýchaskege bólinip uıymdastyrylǵan. Turǵyndardy evakýatsııalaý jumystary júrgizilip, oqıǵanyń mán-jaıy anyqtalyp jatyr.

Eske sala keteıik, Astana qalasynyń Esil aýdanyndaǵy Túrkistan kóshesinde ornalasqan 21 qabatty turǵyn úıdiń 15-qabatyndaǵy páterden órt shyqqan edi.

Sonymen qatar Astanada túngi ýaqytta bolǵan órt saldarynan turǵyn úıde kámeletke tolmaǵan úsh bala qaza taýyp, oqıǵa boıynsha qylmystyq is qozǵaldy.