Elordada kópirden sekirgen qyz qutqaryldy
NUR-SULTAN. QazAqparat - Búgin elordada saǵat 19:10-da kópirden sekirip ketken boıjetken qutqaryldy, dep habarlaıdy QazAqparat tilshisi.
«Búgin saǵat 19:10-da Jedel basqarý ortalyǵynan «112» qyzmetine kýágerler men qutqarýshylar kópirden sekirip ketken 2002 jylǵy boıjetkendi qutqarǵany týraly habar kelgen.
«Qýanyshqa oraı, oqıǵa bolǵan orynnan alys emes jerdegi jaǵalaýda Azat Kúsherbaev pen
Mıhaıl Chıjık esimdi demalýshylar bolǵan. Sýǵa aldymen Azat, odan keıin Mıhaıl sekirgen. Olar sýda qozǵalyssyz jatqan boıjetkendi qutqarý áreketin jasaǵan», - delingen Nur-Sultan qalalyq TJD baspasóz habarlamasynda.
Bul ýaqytta «Tulpar» kópirin kúzetip júrgen qutqarýshylar sýdaǵy adamdardy kórip, oqıǵa ornyna katermen barǵan.
«Olar kýágerlermen birge boıjetkendi sýdan alyp shyqqan. Sý-qutqarý beketine kelgennen keıin jedel járdem jetkenshe boıjetkenge psıhologııalyq jáne medıtsınalyq kómek kórsetilgen. Onyń densaýlyq jaǵdaıy qanaǵattanarlyq, #2 qalalyq aýrýhanaǵa jetkizildi», - delingen habarlamada.
Habarlamada jazylǵandaı, búgingi kúnniń batyrlary - Azat Kúsherbaev. Ol 1993 jyly týǵan, bıden sabaq beredi.
Chıjık Mıhaıl - 1993 jyly týǵan. Jeke uıymda ınjener bolyp jumys isteıdi.
Qaırat Júsúpov - aǵa qutqarýshy, Jiger Temirálı - Nur-Sultan qalalyq TJD-nyń jedel-qutqarý otrıadynyń qutqarýshysy.
«Oqıǵa bolǵan kezde eshteńe oılaǵan joqpyz. Bar oıymyz qutqarýǵa úlgerý týraly boldy. Qutqarýshylarmen birlesip adam ómirin qutqaryp qalǵanymyz úshin alǵys aıtamyz», - deıdi Azat pen Mıhaıl.
