Elordada kópbalaly otbasylardyń biryńǵaı tizimi jasaldy
ASTANA. QazAqparat - Elordalyq kópbalaly otbasylardyń biryńǵaı tizimi jasaqtalyp, derekqor quryldy. Bul týraly Astana qalasy ákiminiń orynbasary Málıka Bekturova málim etti, dep habarlaıdy QazAqparat tilshisi.
«Ákimdikke kelip túsken barlyq ótinishterdi biz taldadyq. Onyń nátıjesinde 267 ótinishtiń 260-nyń memleket tarapynan qarastyrylǵan barlyq járdemaqy túrlerin alatyndyǵy anyqtaldy. Qalǵan úmitkerlerge bul jeńildikter taǵaıyndalmaıdy. Sondaı-aq, bilim berý salasy boıynsha 28 ótinish kelip tústi, onyń 8-i balabaqshaǵa ornalastyrýǵa, 10-y tegin tamaqtanýǵa ruqsat surady.Onyń barlyǵyna qoldanystaǵy erejege saı jaýaptar berildi», - dedi ol ákimdik otyrysynda.
Odan bólek, ákim orynbasary Astanadaǵy kópbalaly otbasylardyń turmystyq-áleýmettik jaǵdaıyn anyqtap, zertteý maqsatynda arnaıy derekqor qurylǵanyn aıtyp ótti.
«6 aqpannan bastap Astanadaǵy aýdan ákimdikterinde ýchaskelik komıssııa kúndelikti kópbalaly jáne otbasylyq jaǵdaıy tómen azamattardy qabyldaýda. Olarǵa tıisti keńester men túsinikteme berilýde. Árbir otbasyny jan-jaqty zertteý úshin biz kópbalaly otbasylardyń derekqoryn qurýdy bastadyq. Onda otbasy músheleri týraly málimetterdiń tolyu bazasy bolady. Odan soń, ár otbasynyń turmystyq jaǵdaıyn anyqtaı otyryp, olardyń suraqtary men áleýttik jaǵdaıy qadaǵalanatyn bolady», - dedi ol.
Sondaı-aq, M.Bekturova ótken aptada Eńbek jáne halyqty áleýmettik qorǵaý mınıstrligine ákimdik tarapynan usynystar jiberilgenin tilge tıek etti. Atap aıtqanda, olar kópbalaly otbasylarǵa beriletin járdemaqy kólemin esepteýdi qaıta qaraý jáne ataýly áleýmettik kómektiń shekti mólsherin arttyrýǵa qatysty.
