Elordada kóp balaly jáne turmysy nashar otbasynan shyqqan 60 balaǵa áleýmettik kómek kórsetildi
ASTANA. 20 tamyz. QazAqparat - Astanada kóp balaly jáne turmysy nashar otbasynan shyqqan 8 myń balaǵa áleýmettik kómek kórsetiledi. Bul týraly astana.kz saıtyna Astana qalasy Esil aýdany ákimdiginen habarlady.
Búgin Astana qalasynyń Esil aýdanynda kóp balaly jáne turmysy nashar otbasynan shyqqan 60 balaǵa mektep formasy, keńse taýarlary men rıýkzaktar, sport zattary berildi.
«Ótken jyly 6 myń balaǵa járdem kórsettik, bıyl 8 myńǵa jýyq balany qamtýdy josparlap otyrmyz. Atalǵan aktsııany ótkizýge qol ushyn bergen demeýshilerge alǵysymdy bildiremin. Іs-sharanyń basty maqsaty - balalardy mektepke daıyndaý bolyp tabylady. Óıtkeni, balalary kóp, túrli sebeptermen balany mektepke daıyndaı almaıtyn otbasylar bar ǵoı. Bizdiń aktsııaǵa qolǵabys etken kásiporyndar, memlekettik mekemeler, jeke bıznes qurylymdardyń bar bolǵanyna qýanyshtymyn», - dedi Balalar quqyǵyn qorǵaý jónindegi basqarmasynyń basshysy Rımma Imanǵazınova.
Atap aıtqanda, № 7, 49, 15, 18, 61, 20, 50, 23, 65, 34, 54, 19, 40 oqıtyn balalarǵa kómek kórsetildi.
Eske salaıyq, elimizde 1 tamyz - 30 qyrkúıek aralyǵynda «Mektepke jol» respýblıkalyq aktsııasy ótkiziledi. Іs-shara kóp balaly jáne turmysy nashar otbasynan shyqqan, jetim jáne ata-anasynyń qamqorlyǵynsyz qalǵan balalarǵa kómektesýge baǵyttalǵan.
