Elordada konkýrdan Qazaqstan chempıonaty ótip jatyr

ASTANA. KAZINFORM – Astana irgesindegi «Arǵymaq» at sporty-saýyqtyrý kesheninde jańa maýsymnyń alǵashqy jarysy sanalatyn konkýrdan Qazaqstan chempıonaty ótip jatyr, dep habarlaıdy elorda ákimdiginiń resmı saıty.

Aýqymdy dodaǵa Astana, Almaty, Shymkent qalalary men Almaty oblysynan 19 shabandoz ben 34 at qatysyp jatyr. Olar saıys barysynda bıiktigi 120, 130, 140 sm quraıtyn kedergilerde saıysqa túsedi. 

– Jabyq keshendegi chempıonatta elimizdegi myqty shabandozdar synǵa túsýde. Jarys qorytyndysy boıynsha, myqtylardy iriktep, sáýir aıynda Tashkent, Bishkek jáne Astana qalalaryndaǵy álemdik kezeńge jiberemiz. Bıylǵy jyldyń basty maqsaty – kúzdegi jazǵy Azııa oıyndaryna joldama alý. Maýsym barysyn qarap, tolyqtaı sheshim shyǵaramyz, - dedi at sporty federatsııasy bas hatshysynyń mindetin atqarýshy Azat Tolkýnbekov.

Konkýrdyń basty ereksheligi – áıelder men erler jynysy, jasy boıynsha bólinbeı, birge saıysqa túse beredi.

Búgingi jarys kúni bıiktigi 120 santımerdi quraıtyn kedergiden sekirý boıynsha jeńimpaz atanǵandar:

1-oryn: Raısa Sokolenko (Klıýgold) – 1:02.72;

2-oryn: Oleg Sokolenko (Koreandr vant lozerhof Zet) – 1:02.94;

3-oryn: Oleg Sokolenko (Koreandr vant lozerhof Zet) – 1:04.72.

Jarystyń tolyq jeńimpazdary 29 naýryz kúni anyqtalady.

Aıta keteıik, konkýr saıysynan ótken jyly Astana qalasy uzaq jyldardan keıin Eýrazııa Lıgasy álem kýbogynyń kezeńin qabyldaǵan bolatyn.

Buǵan deıin Astanada konkýrdan Qazaqstan chempıonatynyń jeńimpazdary anyqtalǵanyn jazǵanbyz.