Elordada konkımen júgirýden Qazaqstan kýbogynyń irikteý kezeńi ótedi

ASTANA. KAZINFORM — Astanada konkımen júgirýden el kýbogynyń irikteý kezeńi ótedi.

Ulttyq olımpıada komıtetiniń málimetine súıensek, qazir ulttyq qurama elordada oqý-jattyǵý jıynyn ótkizip jatyr. Odan keıin mańyzdy respýblıkalyq týrnır bastalady.

Qazaqstan kýbogy 13-15 qazan aralyǵynda ótedi. Onyń qorytyndysy boıynsha jańa maýsymda el namysyn qorǵaıtyn jáne Olımpıadaǵa joldama alý úshin Álem kýbogynyń irikteý kezeńderinde synǵa túsetin qurama jasaqtalady.

2026 jylǵy Olımpıadaǵa irikteý tórt Álem kýbogy kezeńinen turady. Onyń birinshisi 14-16 qarasha aralyǵynda AQSh-tyń Solt-Leık-Sıtı qalasynda uıymdastyrylady. Ekinshi kezeń 21-23 qarashada Kanadanyń Kalgarı qalasynda ótedi.

Úshinshi kezeń Nıderlandtyń Herenven qalasynda 5-7 jeltoqsan kúnderi ótse, tórtinshisi 12-14 jeltoqsan aralyǵynda Norvegııanyń Hamar qalasynda bolady.

Eske sala ketıik, buǵan deıin «Barys» hokkeı komandasynyń elordada «Lokomotıvten» jeńilip qalǵanyn jazǵanbyz.