Elordada kommýnaldyq tólem boıynsha qansha adamǵa jeńildik beriledi
Ortalyq kommýnıkatsııalar qyzmetindegi onlaın baspasóz máslıhatynda oǵan kommýnaldyq qyzmetter úshin 15 teńge kóleminde ótemaqyny tóleý qashan bastalatyndyǵy jóninde saýal joldandy.
«Úkimet tarapynan tıisti arnaıy nusqaý erejesi shyqty. Sol erejege sáıkes, arnaıy shtabpen osy máseleni qarastyryp jatyrmyz. Búgingi tańda 54 myńdaı adamǵa osy 15 myń teńgelik kommýnaldyq ótemaqyny berý múmkindigin qarastyrýdamyz», - dedi ákim orynbasary.
Osy oraıda ol qazirgi tańda qajetti jumystardy elektrondy túrde Smart Astana arqyly iske asyrý josparlanyp otyrǵanyn atap ótti.
«1-2 kúnniń ishinde tıisti sharalardy atqaramyz. Sáıkesinshe, aqparat quraldaryna tıisti málimetti jarııalaımyz. Bul jumystardy Smart Astana bazasynda iske asyramyz ba dep otyrmyz», - dedi Baqtııar Máken.
Budan buryn habarlanǵandaı, QR Indýstrııa jáne ınfraqurylymdyq damý mınıstrligi karantınge jabylǵan óńirlerdegi halyqtyń jekelegen sanattarynyń kommýnaldyq shyǵyny úshin 15 myń teńgeden aýdarylatynyn málim etti.
Naqtyraq aıtqanda, karantın engizilgen óńirlerde ákimdikter tutynýshylardyń derbes (abonenttik) shottaryna 2 aı boıy 15 myń teńgeden aýdaryp otyrady. Memlekettik organdardyń usynysy negizinde tólem alýshylardyń kelesi sanattary aıqyndalǵan.
Olar: - 1, 2, 3 top múgedekteri;
- múgedek balalardy tárbıelep otyrǵan otbasylar;
- kópbalaly otbasylar;
- UOS múgedekteri men qatysýshylary, UOS múgedekteri men qatysýshylaryna teńestirilgen tulǵalar;
- memlekettik nemese qoǵamdyq mindetterin, áskerı qyzmetin oryndaý barysynda, ǵarysh keńistigine ushýǵa daıyndyq barysynda nemese ushý kezinde, adam ómirin qutqarý jáne quqyq tártibin saqtaý kezinde qaza tapqan tulǵalardyń otbasylary;
- tómen jáne odan az zeınetaqy alatyn zeınetkerler;
- ataýly áleýmettik kómek alatyn azamattar, onyń ishinde jalǵyzbasty zeınetkerler.
Kommýnaldyq qyzmetter úshin 15 myń teńge tóleýge ótinim qabyldaý ákimdikter ótinim qabyldaıtyn arnaıy júıeni iske qosqan soń bastalady.
