Elordada kommýnaldyq qyzmetkerlerdiń qurmetine saıabaq pen stella ashyldy
ASTANA. KAZINFORM – Astana qalasynyń Baıqońyr aýdanynda kommýnaldyq qyzmet salasy jumysshylaryna erekshe qurmet kórsetildi.
Tańerteń Abaı dańǵyly boıyndaǵy saıabaqqa qalyń jurt jınaldy. 6 shilde Astana kúni merekesine oraı elordanyń kommýnaldyq qyzmet salasy jumysshylarynyń qurmetine «Kommýnaldyq qyzmetkerler» saıabaǵy jáne stella saltanatty túrde ashyldy.
– Elorda kúni qarsańynda qala ákimdigi jáne Baıqońyr aýdany ákimdiginiń uıytqy bolýymen Abaı dańǵyly boıynda kommýnaldyq qyzmetkerleriniń qurmetine keńistik ashyldy. Bul qurmet bıyl jumysshy mamandyqtary jyly aıasynda barsha kommýnaldyq salada eńbek etip jatqan jumysshylarǵa degen alǵys pen taǵzym, - dedi Astana qalalyq máslıhatynyń tóraǵasy Tabıǵat Zeınýlqabdın qoǵamdyq keńistiktiń ashylýyna arnalǵan is-sharada.
Odan bólek, keńistik aýmaǵynda stella qoıyldy.
– Stella qamysqa uqsaıdy, ózderińiz bilesizder Aqmola oblysynyń aýmaǵy qamysty, qazir Astana qalasy kórkeıgen, buryn Aqmola kezinde bul jerde qamys ósken, myna jerde Aqbulaq, arǵy jaǵynda Esil ózeni aǵyp jatyr. Stella da qamys jáne sýdyń tamshylary beınelengen, - deıdi ol.
Saıabaq aýdan turǵyndary úshin qolaıly ári jaıly jerde ornalasqan, sondaı-aq abattandyrý jáne kógaldandyrý jumysy júrgizilgen.
– Kommýnaldyq qyzmet jumysshylarynyń eńbegi zor, olarǵa sheksiz alǵys aıtamyn. Stella jaıdan-jaı bul jerde ashylmady, bul tamasha jer, ıaǵnı Uly Abaı dańǵylynda, elordany sýmen qamtyp otyrǵan «Astana sý arnasy» mekemesiniń aldynda ashylyp otyr. Bul jerden artyq jer joq. Ózim energetıka, kommýnaldyq qyzmet salasynda biraz jyl eńbek etip, ardager atanyp, zeınetke shyqtym, - deıdi elordalyq ardager Qalymtaı Qazybaev.
Saıabaqtyń jalpy aýdany 10 700 sharshy metrdi quraıdy jáne ol Jubanov kóshesinen Pýshkın kóshesine deıingi aýmaqty qamtıdy. Abattandyrý jumysy aıasynda 3 500 sharshy metr aýmaqta kespetastar jáne 2 000 sharshy metr asfalt jabyny tóseldi. Odan bólek, 100 kólikke arnalǵan avtoturaq qarastyrylǵan.
– Kógaldandyrý jumysyna kelsek, gúlzar aýmaǵynda kólemi 6 000 sharshy metrdi quraıtyn jańa kógal tóselip, sýarýdy tolyq avtomattandyrýǵa múmkindik beretin jergilikti sýarý júıesi iske qosyldy. Júıe 20 000 sharshy metr jasyl alqapty qamtıdy. Sondaı-aq aǵashtardyń estetıkalyq kelbeti men ósýine jaǵdaı jasaý maqsatynda 210 shtamb kóterildi, - deıdi Baıqońyr aýdanynyń ákimi Talǵat Rahmanberdi.
Aıta keteıik, budan bólek keshendi abattandyrý barysynda balalar men eresekterge arnalǵan oıyn jáne sport alańdary jabdyqtaldy. Turǵyndardyń qaýipsizdigi men jaılylyǵy maqsatynda aýqymdy jaryqtandyrý jumysy, atap aıtqanda 33 saıabaq shamy, 4 kishi arhıtektýralyq forma, 1 vorkaýt alańy jáne 7 jattyǵý qurylǵysy jáne dala jıhazy ornatyldy.
Stellanyń ashylý rásimine Astana qalasy máslıhatynyń basshylyǵy, Baıqońyr aýdanynyń ákimi, qoǵam qaıratkerleri, belsendi jastar men aýdan turǵyndary qatysty. Sondaı-aq resmı is-shara kontserttik baǵdarlamaǵa jalǵasty.