Elordada kómir satatyn oryndarda dúrbeleń joq – Qanat Kóbesov
NUR-SULTAN. QazAqparat – «QTJ-Júk tasymaly» JShS bas dırektorynyń orynbasary Qanat Kóbesov elordany kómirmen qamtamasyz etýge qatysy jaǵdaıǵa túsinikteme berdi, dep habarlaıdy QazAqparat tilshisi.
«Aıtarlyqtaı dúrbeleń (kómir satylatyn temir jol tuıyqtarynda) joq. Oryn alǵan dúrligý alypsatarlyq, ıaǵnı ol kómir satýshylarmen tikeleı baılanysty. Qarapaıym ǵana statıstıkalyq derek keltire keteıin, qazan aıynyń 7 kúniniń ishinde Nur-Sultanǵa 171 vagon kómir túsirdik», - dedi Qanat Kóbesov elordanyń kómir satatyn tuıyqtaryna baspasóz-týry barysynda.
Onyń atap ótýinshe, kómir tańdaýda da turǵyndarǵa eshqandaı problema týyndamaýy tıis.
«Bizde Maıkóbe, Shubarkól, Qarajyra syndy kenishterden ákelingen ártúrli kómir bar. Bizge ótinimderdiń bárin qabyldap alýshy beredi. Nur-Sultanda 8 temir jol tuıyǵy jáne 14 qabyldap alýshy bar. Qabyldaý alýshylar halyqqa kómir satýmen de aınalysady. Elordaǵa shamamen 10 myń tonna kómir kerek. Búgin Nur-Sultan stansasynda 20 vagonnan kómir túsirildi. Qabyldaý alýshylar bergen ótinimge sáıkes qajettilikti tolyq jabamyz», - dedi ol.
Aıta keteıik, Nur-Sultan qalasynda 14 kirme temir joly bar. Baspasóz-týry barysynda atalǵan joldarda kómir tıelgen 75 vagon turdy. Buǵan qosa 138 vagon kómir jolda. Olar taıaý kúnde elordaǵa jetkizilmek.
