Elordada «Qoljetimdi baspana-2020» baǵdarlamasy boıynsha qujattar qabyldaý bastaldy

ASTANA. QazAqparat - Jas otbasylardy turǵyn úımen qamtamasyz etý «Qoljetimdi baspana-2020» baǵdarlamasynyń mańyzdy baǵyttarynyń biri bolyp tabylady. Búgin Halyqqa qyzmet kórsetý ortalyqtarynda qujattardy qabyldaý bastaldy, dep habarlaıdy elorda ákimdiginiń resmı saıtynda.

Astana qalasynyń Turǵyn úı basqarmasy basshysynyń orynbasary Rýslan Ahmetovtiń aıtýynsha, irikteý balldyq júıemen júrgiziledi. «Bul júıe boıynsha bir balaǵa 20 balldan, árbir ekinshi jáne odan keıingi balalarǵa 30 balldan esepteledi. Sonymen qatar, komıssııa sońǵy bes jylda Qazaqstan Respýblıkasynyń aýmaǵynda menshik quqyǵymen baspanasynyń bolýyn jáne ony ıelikten shyǵarý jaǵdaılaryn tekseredi»,- dedi ol. Munymen qosa, sozylmaly aýrýlardyń keıbir aýyr túrlerimen aýyratyn nemese múgedek bolyp tabylatyn otbasynyń árbir múshesi úshin 10 ball; memlekettik baǵdarlamalar sheńberinde aldaǵy irikteý kezinde salynǵan turǵyn úıdiń tizimine qosylmaǵan úmitkerler úshin 5 ball; kámeletke tolǵanǵa deıin ata-analarynan aıyrylǵan 29 jasqa tolmaǵan jetim balalar men ata-anasynyń qamqorlyǵynsyz qalǵan balalar sanatyna jatatyn erli-zaıyptylardyń árbireýi úshin 10 ball qosylady. «Atalǵan krıterııler boıynsha azamattardan qujattardy qabyldaý 14 maýsymǵa deıin HQKO-larda úzilissiz júrgiziledi. Sabyr saqtaýdy suraımyz», - dedi memlekettik qyzmetter kórsetý sapasyn saqtaýdy baqylaý bóliminiń basshysy Rýslan Besheev. Eske salaıyq, bıyl 672 jas otbasy qonys toıyn toılaıtyn bolady. Baǵdarlamaǵa qatysý úshin keminde eki jyl nekede turǵan jáne erli-zaıyptylardyń ekeýi de 29 jasqa tolmaǵan jas otbasy (baǵdarlamaǵa qatysýǵa ótinish bergen sátke), sondaı-aq Astana qalasynda keminde eki jyl tirkelimi bar balalary (balasyn) 29 jasqa tolmaǵan, onyń ishinde ajyrasqan, jesir ata-ananyń bireýi tárbıeleıtin tolyq emes otbasy ótinish bere alady.