Elordada qolónershilerdi daıyndaý ortalyǵyn ashý josparlanyp otyr
«Pandemııa kezinde týrızm salasyndaǵy jaǵdaı qıyndaǵan bolatyn. Jalpy dúnıejúzi boıynsha týrıster sany 70 paıyzǵa azaıǵan edi. Qazirgi kezde jaǵdaı turaqtanyp, áýe reısteri men týrıster sany artyp keledi. Elordada MICE-týrızmniń orny bólek, ıaǵnı túrli forýmdar, bıznes týrızm baǵytynda jumys istemekpiz. Degenmen, osy salalalarda kadr tapshylyǵy sezilip otyr. Sondyqtan kadr daıarlaý maqsatynda búgin sala mamandarymen keńespekpiz», - dedi E. Baltaev Astana Polytechnic joǵary kolledjinde týrızm salasyn damytý taqyrybyna arnalǵan jıynda.
Onyń aıtýynsha, álemde týrızm salasy jumys ornyn qurýda qarajatty az talap etetin ındýstrııa bolyp otyr.
«Osy oraıda jańa mamandyqtardy engizý josparymyzda bar. MICE-menedjer, Event-menedjer, gıdter, qolónershiler kerek. Qolónerdi joǵary tabys kózine aınaldyrýǵa bolady. Týrıster elimizge saparlap kelgende ulttyq ereksheligi bar zattardy satyp alýǵa tyrysady. Bolashaqta qolónershilerdi daıyndaý ortalyǵyn ashsaq degen josparymyz bar», - dedi basqarma basshysy.
E. Baltaevtyń sózine qaraǵanda, elordada 5 JOO men 11 kolledj týrızm boıynsha maman daıarlap jatyr.
Qazirgi kezde osy oqý oryndarynda 2800-ge jýyq stýdent bilim alyp júr. Bıyl 600-ge jýyǵy oqý ornyn támamdaıdy.
«Olardyń qazirgi mamandyqtary jalpy týrızm, qonaq úı menedjmenti, meıramhana menedjmenti sekildi baǵyttardy qamtyǵan. Al gıdterdi, MICE-menedjerlerdi daıarlaýda tapshylyq bar. Álemde bul mamandyqtarǵa suranys joǵary», - dedi ol.
«Biz tıisti zertteý júrgizgen edik. Qarapaıym týrıster kelgen kezde, olar shamamen kúnine 200-300 AQSh dollary somasynda, al bıznes, MICE-týrızm baǵytynda keletin týrıster kúnine 1,5 myń dollardan astam qarajat jumsaıdy. Sondyqtan bul salanyń ekonomıkalyq nátıjesi jaqsy bolady», - dedi basqarma basshysy.
