Elordada kolledjge oqýǵa nıet tanytqandardan qujat qabyldaý bastaldy
ASTANA. QazAqparat - Kolledjge oqýǵa túsýshiler úshin Astana qalasynyń tehnıkalyq jáne kásiptik bilim berý uıymdarynda qabyldaý komıssııasy óz jumysyn bastady.
Bul týraly Astana qalalyq bilim basqarmasynan habarlady.
Qujattardy qabyldaý 2012 jyldyń 19 qańtaryndaǵy № 130 «Tehnıkalyq jáne kásiptik bilimniń bilim berý baǵdarlamalaryn iske asyratyn bilim berý uıymdaryna oqýǵa qabyldaýdyń úlgi qaǵıdalaryn bekitý týraly» Qazaqstan Respýblıkasy Úkimetiniń Qaýlysyna sáıkes júrgiziledi.
Kolledjge oqýǵa túsýge nıet bildirgen tulǵalardan ótinishter:
- 20 maýsym men 20 tamyz aralyǵynda oqýdyń kúndizgi nysanyna;
- 20 maýsym men 20 qyrkúıek aralyǵynda oqýdyń keshki jáne syrttaı nysanyna;
- 20 maýsym men 20 shilde aralyǵynda óner jáne mádenıet mamandyqtary boıynsha qabyldanady.
Oqýǵa túsýshiler men olardyń ata-analaryna (zańdy ókilderi) arnalǵan oqý ornynyń qyzmeti men ondaǵy mamandyqtar týraly aqparat kolledjderdiń resmı saıtynda jáne oqý ornyndaǵy qabyldaý komıssııasynyń aqparattyq stendterinde ornalasqan.
Kúndizgi oqý bólimine qabyldaýdyń nátıjeleri týraly qorytyndy aqparatty 30 tamyzǵa deıin, syrttaı jáne keshki oqý bólimine 30 qyrkúıekke deıin bilýge bolady. Málimet uıymnyń aqparattyq stendterinde ornalastyrylady.
