Elordada kólik sany 10%-ǵa ósti: keptelis máselesi qalaı sheshilmek

ASTANA. KAZINFORM — Astana qalalyq kólik jáne jol-kólik ınfraqurylymy basqarmasy avtokólikter sanynyń ósýi jol keptelisiniń negizgi sebebi ekenin málimdedi.Basqarma basshysy Ashat Qaraǵoıshın qaladaǵy jol keptelisiniń kóbeıgenin rastady.

Onyń aıtýynsha, bıylǵy toǵyz aıda avtokólikter sany 10%-ǵa artqan, bul sońǵy úsh jyldaǵy ósimnen asyp túsedi. 

- Keptelis – megapolısterdiń barlyǵyna tán problema. Elorda da qarqyndy damyp, kún saıyn keńeıip, turǵyndarynyń sany artyp keledi, – dedi Qaraǵoıshın.

Qala ákimdigi kólik júktemesin azaıtý úshin qoǵamdyq kólikti damytýǵa basymdyq berip otyr. Ásirese qoǵamdyq kólik qozǵalysyn jedeldetý jáne jolaýshylarǵa qolaıly jaǵdaı jasaý basty nazarda. Qazirgi ýaqytta astanalyqtardyń 40%-ǵa jýyǵy qoǵamdyq kólikti qoldansa, bul kórsetkishti 70%-ǵa jetkizý josparlanǵan.
Basqarma ókili Astanada keptelisten qutylý úshin túrli mekemelerde jumys ýaqytyn ózgertý bastamasy qandaı nátıje bergenin aıtyp berdi.

- Jedel nátıjelerdi birden kútýge bolmaıdy. Tańerteń jumys bastalý ýaqytyn ózgertý arqyly qozǵalysty jeńildetýge tyrystyq, alaıda keshkisin turǵyndardyń kópshiligi úılerine qaıtatyndyqtan keptelis qaıta paıda bolady. Qazirgi tańda bul másele boıynsha júıeli jumys júrgizilip jatyr, avtobýstar sany artty. Aıtarlyqtaı nátıjeni aldaǵy eki jylda kóremiz, – dedi basqarma basshysy.

Buǵan deıin Astana qalalyq máslıhaty turǵylyqty jáne ýaqytsha turý orny boıynsha jańa tirkeý normasyn bekitkenin habarlaǵan edik. Endi árbir 15 sharshy metr paıdaly turǵyn alańyna bir adamnan artyq tirkelýge ruqsat etilmeıdi.