Elordada kólikterdiń memlekettik nómirin urlap, syıaqy talap etken er adam ustaldy

NUR-SULTAN. QazAqparat - Qala turǵyny polıtsııaǵa Baıseıitova kóshesi boıynda belgisiz bireý «Hıýndaı Elantra» avtokóliginiń memlekettik nómirin urlap ketkenin aıtyp aryzdanǵan, dep habarlaıdy QazAqparat Nur-Sultan qalasy polıtsııa departamentiniń baspasóz qyzmetine silteme jasap.

Bopsalaýshyny elordalyq polıtsııa qamaýǵa aldy. Ol buryn sottalǵan 25 jastaǵy elorda turǵyny bolyp shyqty.

Qylmysker áreketiniń shemasy qarapaıym. Ol kólikterden memlekettik tirkeý belgilerin alyp tastap, onyń ornyna kóliktiń aldyńǵy áınegine nómirdi qalaı qaıtarý kerektigi týraly Telegram-arnaǵa silteme bar jazba qaldyrǵan. Sosyn kólik ıelerinen habarlama kútken. Kólik ıeleri baılanysqa shyqqannan keıin qaskúnem aqsha aýdarý úshin bank kartalarynyń nómirlerin nemese abonenttik nómirlerdi jibergen. Qyzmeti úshin 10 myń teńge surady. Qazirgi ýaqytta onyń áreketinen 8 adam zardap shekkeni anyqtaldy.

Atalǵan fakti boıynsha «bopsalaý» baby boıynsha qylmystyq is qozǵalyp, ustalǵan azamattyń elorda aýmaǵynda buryn jasalǵan qylmystarǵa qatystylyǵy tekserilýde.

Nur-Sultan qalasynyń polıtsııa departamenti kúzetiletin turaqtar, sondaı-aq beınebaqylaý kameralarymen jabdyqtalǵan avtoturaqtar kólikterdi urlaýdyń aldyn alýǵa septigin tıgizetinin eskertedi.