Elordada kólik júrgizýshiler qandaı jol erejesin jıi buzady
NUR-SULTAN. QazAqparat – Jyl basynan e elordada 407 172 júrgizýshi jyldamdyqty asyryp, 396 650 júrgizýshi jol belgisiniń talaptaryn saqtamaǵan, dep habarlaıdy QazAqparat tilshisi.
Bul týraly Nur-Sultan qalasynyń polıtsııa departamentiniń baspasóz qyzmeti málim etti.
«Elordada jyl basynan beri mas bola turyp kólik júrgizgen 1200-ge jýyq júrgizýshi ustaldy. 2 690 jaıaý júrginshi ereje buzsa, 1 498 júrgizýshiniń áreketinen avarııalyq jaǵdaı týyndaǵan. 6 882 júrgizýshi kólik qańtarý jáne aıaldaý erejesin buzǵan. Osy bassyzdyqtarǵa jol bergenderdiń ishinde 1500-ge jýyq júrgizýshi kólik aıdaý quqyǵynan aıyrylyp, 849 júrgizýshi qamaýǵa alyndy», - delingen departamenttiń dereginde.
Polıtsııa qyzmetkerleriniń aıtýynsha, jyl ótken saıyn jaıaý júrginshilerdiń ereje buzýy artyp keledi.
«2020 jyly 10 032 buzýshylyq anyqtalsa, 2021 jyly 16 536 ereje buzý faktisi anyqtaldy. Qala boıynsha 6000-nan astam «Sergek» kamerasy ornatylǵan. Solardyń kómegimen 824 281 jol erejesin buzý faktisi tirkeldi. Ásirese jyldamdyqty arttyrý jáne jol belgilerin elemeý jıi tirkeledi. Jyl basynan beri 407 172 júrgizýshi jyldamdyqty asyryp, 396 650 júrgizýshi jol belgisiniń talaptaryn saqtamaǵan», - dep jazady departamenttiń baspasóz qyzmeti.
