Elordada kólik urlady degen kúdikpen eki jigit ustaldy

NUR-SULTAN. QazAqparat – Elordada avtokólik urlyǵyna qatysy bar degen kúdikpen eki jas jigit ustaldy, dep habarlaıdy QazAqparat.

«A. Zataevıch kóshesi boıynda bolǵan qalanyń eki turǵyny esigi qulyptanbaǵan «Vaz 2115» kóligin baıqap qalǵan. Keıinnen olar bul avtomobıldiń akkýmýlıatoryn jymqyryp ketken. Olardyń bul áreketi syrtqy baqylaý beınekamerasyna túsip qaldy», - delingen qalalyq polıtsııa departamentiniń málimetinde.

Kúdiktilerdiń qylmystyq áreketi osymen toqtamaǵan, urlanǵan zatty kóterip alyp, Aqan seri kóshesine qaraı baǵyt alǵan. Sol mańda esigi ashyq qalǵan taǵy bir «Vaz» kóligin baıqap qalady. Osy múmkindiktikti paıdalanyp, kúdiktiler kólikti otaldyryp, minip ketedi.

«Polıtseıler kólikti izdep taýyp, kúdiktilerdi quryqtady. Olar buryn qylmystyq jaýapqa tartylǵan eken, biri 18 jasta bolsa, ekinshisi 22-ge tolǵan. Eki fakti boıynsha sotqa deıingi tergeý amaldary júrip jatyr. Olardyń osy tektes qylmystarǵa qatystylyǵy tekserilip jatyr» - dep atalyp ótken habarlamada.