Elordada kólik órtený faktileri 80% artqan
ASTANA. QazAqparat – Elordada kóliktegi órtterdiń sany artty. Bul týraly Astana qalasy kommýnıkatsııalar qyzmetinde ótken brıfıngide Tótenshe jaǵdaılar departamenti memlekettik órt baqylaý basqarmasynyń basshysy Erkin Otarǵalymuly aıtty, dep habarlaıdy QazAqparat tilshisi.
«Órttiń kóp bóligi turǵyn úılerde jáne kólikte bolady. Búgingi kúni kóliktegi órtterdiń sany 80 paıyzǵa artyp otyr. Árıne, buǵan obektıvti jáne sýbektıvti faktorlar áser etedi», - dedi ol.
Erkin Otarǵalymulynyń aıtýynsha, órtter negizinen paıdalaný merzimi 10 jyldan asatyn kólik quraldarynda jıi bolady. Júrgizýshiler kóbine temir tulparlardyń jaı-kúıin baqylaý maqsatynda tekseristen ótpeıdi.
Sonymen qosa, ol brıfıng barysynda elordadaǵy bıznes obektilerdi tekserý nátıjesinde órt qaýipsizdigi erejelerine sáıkes kelmeıtin 4 195 derek anyqtalǵanyn aıtty.
