Elordada kólik qyzmetkerleriniń kásibı merekesi atalyp ótti
NUR-SULTAN. QazAqparat - Jyldaǵy dástúrge aınalǵan «Kólik qyzmetkerleriniń kásibı merekesi» bıylǵy jyly erekshe atalyp ótti, dep habarlaıdy QR Indýstrııa jáne ınfraqurylymdyq damý mınıstrliginiń Kólik komıtetiniń baspasóz qyzmeti.
«QR Tuńǵysh Prezıdenti, Elbasy N. Nazarbaevtyń 2019 jyldy «Jastar jyly» dep ataýynyń mańyzy men maqsaty zor. Jastardyń keleshegine baǵdar berý, jol kórsetý aǵa býyn ókilderiniń basty paryzy bolyp tabylady. Osy oraıda, QR Indýstrııa jáne ınfraqurylymdyq damý mınıstrliginiń Kólik komıtetiniń ókilderi kólik qyzmetkerleriniń kásibı merekesin Nur-Sultan qalasynyń ákimdigimen birlese otyryp, bas qalamyzdyń botanıkalyq baǵynda atap ótti. Merekege oraı Kólik komıteti jastardyń salaýatty ómir saltyn ustaný maqsatynda jas qyzmetkerler arasynda jappaı júgirýden sporttyq is-shara jáne qala turǵyndary úshin kontserttik baǵdarlama uıymdastyrdy»,-delingen habarlamada.
Kásibı merekeniń saltanatty túrde ashylýy bolyp, onda QR Indýstrııa jáne ınfraqurylymdyq damý mınıstrligi Kólik komıtetiniń tóraǵasy Samat Gılımov merekege oraı qyzmetkerlerge quttyqtaý sóz sóıledi. Sondaı-aq ol merekelik is-sharaǵa qatysýshy jastarǵa sáttilik tilep, merekeniń mańyzdylyǵyna toqtaldy.
«Qala turǵyndary júrgen jerinde tazalyq saqtap, qalamyzdy kútip ustaý úshin turǵyndar da óz úlesin qosýy tıis. Biz qala turǵyndarymen birge «Men qalam úshin ne isteı alamyn?» - atty aktsııa uıymdastyryp, Botanıkalyq baqtyń ishine tazalyq jumystaryn júrgizdik. Sondaı – aq, mereke aıasynda ozat qyzmetkerlerge Kólik salasynyń damýyna qosqan úlesteri úshin «Qurmetti avtokólikshi» jáne «Úzdik avtokólikshi» tósbelgilerin tabys etip, Qurmet gramotasy jáne Alǵys hattarmen marapattadyq», – dedi Kólik komıtetiniń tóraǵasy Samat Gılımov.
foto: 24.kz
