Elordada kólik kartasyn jasatý qymbattady
NUR-SULTAN. QazAqparat – Elordada 1 qyrkúıekten bastap mektep, jeńildigi bar jáne azamattardyń barlyq sanattary úshin kólik kartasyn jasatý jáne qaıta shyǵarý baǵasy 500 teńge bolady, dep habarlaıdy QazAqparat CTS kompanııasyna silteme jasap.
Kólik kompanııasynyń túsindirýinshe, qymbattaý kartany shyǵarýǵa jumsalatyn materıal qunynyń artýyna baılanysty bolǵan.
«Kólik kartasynyń baǵasy ony daıyndaý kezindegi dollardyń teńgege shaqqandaǵy baǵamyna, kóp deńgeıli saqtaý júıesi bar NXP chıpin qoldanýda, paıdalanylatyn jabdyqty jóndeý jáne tehnıkalyq qamtamasyz etýge ketetin shyǵynǵa, tirkelý, fotosýret sekildi basqa da málimetterdi engizý úshin jumsalatyn shyǵynnan quralady», delingen habarlamada.
Buǵan deıin satyp alynǵan karta jaramdy jáne ony aýystyrýdyń qajeti joq.
«Jol aqysyn tóleýdiń elektrondy júıesi 2016 jyly engizilgen. Kólik kartasynyń baǵasy 400 teńge deńgeıinde bekitildi. Ol birneshe devalvatsııa kezinde de ózgergen joq», delingen habarlamada.
Búginde elordada qoǵamdyq kólikte jol aqysyn túrli tásilmen tóleýge bolady. Kólik kartasy, SMS jiberý arqyly, QR kodty skanerleý arqyly, mobıldi qosymshada kólik kodyn engizý arqyly, bank kartasymen, sondaı-aq bıometrıkalyq málimetterdi paıdalaný arqyly.
«Osy kúnge deıin shyǵarylǵan kólik kartalarynyń sany 2 mln-ǵa jetti.
Solardyń ishinde elordada jáne qala mańynda turatyn 155 myńdaı azamat jeńildigi bar kólik kartasymen qamtamasyz etilgen. Jeńildigi barlar qoǵamdyq kólikte tegin júredi.
Sondaı-aq 200 myńnan astam oqýshyǵa ataýly kólik kartasy berilgen.
Nur-Sultan qalasynda jáne qala mańynda turatyn jáne oqıtyn 18 jasqa tolmaǵan balalar úshin qoǵamdyq kólikte jol júrý tegin. Mektep kólik kartasymen valıdatsııany mindetti túrde jasaý kerek.
Eske sala ketsek, elordada 28 tamyzdan bastap avtobýs saǵat 23:00-ge deıin júre bastaıdy.
