Elordada kólik qaqqan 14 jastaǵy jasóspirim esin jıdy
NUR-SULTAN. QazAqparat – Dárigerler 3 jeltoqsanda bolǵan jol-kólik oqıǵasy kezinde zardap shekken jetkinshektiń jaǵdaıy týraly aıtty, dep habarlaıdy QazAqparat tilshisi.
«Balanyń jaǵdaıy qalypty aýyr kúıde. Ol jansaqtaý bóliminde bolǵan joq. Oqıǵadan keıin ol soporozdy jaǵdaıda boldy. Búgin esin jıdy. Suraqtarǵa jaýap berip otyr. Aýyr jaraqat alýyna qaramastan onda jaqsarý dınamıkasy baıqalady», - dedi Nur-Sultan qalalyq №2 balalar aýrýhanasy baspasóz qyzmeti QazAqparat tilshisine.
Budan buryn habarlanǵandaı, jol-kólik oqıǵasy saldarynan 48 jastaǵy áıel oqıǵa ornynda kóz jumdy. 2005 jyly týǵan jasóspirim túrli dene jaraqatymen aýrýhanaǵa jatqyzyldy.
Elordalyq polıtsııa departamentiniń bastyǵy Erjan Sádenovtiń sózine qaraǵanda, 23 jastaǵy kúdikti osyǵan deıin birneshe ret sotty bolǵan. 2013 jyly tonaý faktisi boıynsha, sodan keıin urlyq úshin is qozǵalǵan.
QR QK 345-baby («Adam ólimine ákep soqqan kólik quraldaryn paıdalaný qaǵıdalaryn buzýy») jáne 200-baby («Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý») boıynsha sotqa deıingi tergeý jumystary júrip jatyr. 2 adamdy qaqqan kúdikti eki aıǵa qamaldy.
