Elordada kólik akkýmýlıatoryn urlap jatqan eki turǵyn qolǵa tústi
NUR-SULTAN. QazAqparat - Nur-Sultan qalasynyń polıtsııa qyzmetkerleri kólikterdiń akkýmýlıatorlaryn urlaýmen aınalysty degen kúdikpen eki turǵyndy ustady, dep habarlaıdy QazAqparat elordalyq Polıtsııa departamentiniń baspasóz qyzmetine silteme jasap.
Polıtsııaǵa jergilikti turǵyndardan aýlalarda turǵan kólikterdiń akkýmýlıatorlaryn urlap júrgen urylardyń bar ekendigi jóninde birneshe márte shaǵym túsken. Urlyq kóbine túnde jáne dabyl belgisi joq kólikterge jasalyp kelgen.
Elordanyń krımınaldyq polıtsııa qyzmetkerleri jedel-izdestirý sharalaryn júrgizý barysynda Nur-Sultan qalasynyń eki turǵynyn ustady. Tártip saqshylary urylardy kezekti qylmys ústinde qolǵa túsirdi.
Osy ýaqytta QR QK-niń «Urlyq» babymen sotqa deıingi tergeý amaldary júrgizilp jatyr. Zattaı aıǵaqtar alyndy. Endi olardyń elorda aımaǵynda jasalǵan osy tektes ózge qylmystarǵa qatystylyǵy tekserilýde.
Atalǵan adamdardyń áreketterinen zardap shekkender bolsa, Beıbitshilik kóshesi mekenjaıy boıynsha, Nur-Sultan qalasynyń polıtsııa departamentine kelip, bolmasa 8 (7172) 71-60-24, 71-61-07 jáne 102 telefondaryna habarlasý kerek.
Polıtsııa sonymen qatar kólik ıelerin múlikti qorǵaýdyń qarapaıym ǵana tásilderin qoldanýǵa shaqyrady. Olar: kólikke dabyl belgisin ornatý, kólikti kúzeti bar, beınebaqylaý júıesi ornatylǵan arnaıy oryndarǵa nemese garajǵa qoıý.
