Elordada kóliginiń memlekettik nómirin ádeıi jasyryp qoıǵan júrgizýshi ustaldy

ASTANA. KAZINFORM – Astanada kóliginiń memlekettik nómirin ádeıi jasyryp qoıǵan júrgizýshi ustaldy, – dep habarlaıdy Polisia.kz. 

Elordada «Jalǵan memlekettik nómirler» jedel-profılaktıkalyq is-sharasy aıasynda Kúıgenjar beketinde polıtseıler Howo júk kóligin toqtatty. Tekserý barysynda onyń jol qozǵalysy erejelerin buzǵany úshin aıyppul tóleýden jáne beınebaqylaý arqyly tirkeletin quqyq buzýshylyqtardan jaltarý maqsatynda memlekettik tirkeý nómir belgilerin ádeıi jasyrǵany anyqtaldy.

Júrgizýshi aldyńǵy memlekettik nómirdi tehnıkalyq maı — solıdolmen jaýyp qoıǵan, al artqy nómirdi qardan ádeıi tazalamaǵan, sonyń saldarynan nómir belgisi oqylmaıtyn kúıge túsken. Atalǵan derek boıynsha júrgizýshi memlekettik tirkeý nómir belgilerin sáıkestendirýge kedergi keltiretin materıaldardy qoldana otyryp kólik quralyn basqarǵany úshin jaýapkershilikke tartyldy. Sot sheshimimen qamaýǵa alynyp, bir jyl merzimge kólik quralyn basqarý quqyǵynan aıyryldy. Kólik kommýnaldyq aıyp turaǵyna qoıyldy.

Іs-shara bastalǵaly beri elordada barlyǵy 726 quqyq buzýshylyq anyqtaldy. Onyń ishinde memlekettik tirkeý nómirleri oqylmaıtyn nemese belgilengen talaptarǵa sáıkes kelmeıtin kólik quraldaryn basqarýdyń 176 deregi, nómirsiz kólik basqarýdyń 41 faktisi, jalǵan nómir qoldanýdyń 5 jaǵdaıy, sondaı-aq nómir belgilerin tanýǵa kedergi keltiretin materıaldardy paıdalanýdyń 7 deregi tirkeldi.

Polıtsııa memlekettik nómir belgilerin jasyrýǵa, ózgertýge nemese oqylmaıtyn kúıge keltirýge baǵyttalǵan kez kelgen áreket zańnamaǵa qaıshy ekenin jáne jaýapkershilikke ákeletinin eskertedi. Jol qozǵalysy erejelerin saqtaý — árbir júrgizýshiniń mindeti ǵana emes, joldaǵy qaýipsizdikti qamtamasyz etýge qosylǵan úles.

Eske sala keteıik, buǵan deıin Rıdderde polıtsııaǵa birneshe ret qońyraý shalyp balaǵattaǵan er adam sottalǵanyn jazǵan edik.