Elordada qoqys shyǵarýdy baqylaýǵa múmkindik beretin jańa qurylǵy iske qosylady
ASTANA. 6 aqpan. QazAqparat - Taıaý ýaqytta qaladaǵy qoqysty shyǵarý úderisin baqylaýdy kúsheıtý maqsatynda elektrondyq monıtorıng júıesi engiziledi.
Bul týraly Astana qalasynyń resmı saıty Tabıǵı resýrstar jáne tabıǵatty paıdalanýdy retteý basqarmasyna silteme jasap habarlady.
Basqarmanyń málimetine sáıkes, júıe boıynsha qoqys óńdeıtin keshenderde tarazyǵa, polıgonǵa beınebaqylaý qondyrǵylary ornatylady.
«Buǵan qosa, polıgon aýmaǵynda órt qaýipsizdigi qurylǵylaryn, arnaıy tehnıkalarǵa GPS júıesi qondyrǵysyn ornatý da kózdelgen. Atalǵan júıe kún saıyn qarqyndy damyp kele jatqan Astanaǵa jańa serpin beredi», - deıdi basqarma mamandary.
Eske sala keteıik, buǵan deıin «Astana Tazartý» qalalyq sanıtarlyq tazalaý jáne jınaý kásiporny kólik qozǵalysyn Astana qalasynyń kartasynda erkin baqylaýǵa múmkindik beretin jańa GPS-monıtorıng júıesin ornatqan bolatyn.
