Elordada kókpardyń búkilálemdik erejesi bekitildi
ASTANA. QazAqparat - Endi halyqaralyq dodalarda kókparshylar qazandyqqa emes, sheńberge shabady. Onyń dıametri úsh metr. Al alańnyń uzyndyǵy 200-220 metr, eni 65-75 metr bolýy shart degen standart bekitildi, dep habarlaıdy "Habar 24".
Jańa erejeni Búkilálemdik kókpar qaýymdastyǵyna múshe memleketter jan-jaqty talqylap, bir aýyzdan maquldady. Sondaı-aq búgin qaýymdastyqqa múshelikke jańadan elder qabyldandy. Buryn oǵan Qazaqstan, Majarstan, Mońǵolııa jáne Ózbekstan elderi ǵana kirgen bolsa, búgin músheler sany onǵa jetti. Endi kúsh biriktirsek kókpardy Azııa tipti Olımpıada oıyndarynyń quramyna kirgizýge múmkindik bar deıdi atqaminerler.
Ulttyq sport túrleri qaýymdastyǵynyń prezıdenti Bekbolat Tileýhannyń aıtýynsha, qazandyqty alyp tastap, sheńberge oınaý erejesin usynǵan Mońǵolııa, Vengrııa jáne Tájikstan bolǵan. «Óıtkeni birinshiden, taıqazanǵa oınaý qazaq pen qyrǵyzdan basqa eshkimde damymaı qoıdy. Ekinshiden, shynynda da qıyn. Atqa da aýyr, 3-4 jyldan keıin attyń shabýy da qıyndaıdy. Qanshama jigitter maıyp bolyp jatyr», - deıdi ol.
«Álem jurtshylyǵy sporttyń jańa túrin kórgisi keledi. Sondyqtan biz osy kókpardy nasıhattap álemdik deńgeıge kóterýimiz kerek. Bul jáı ǵana oıyn emes, kóshpendi halyqtyń salt-dástúrin dáripteıdi ári osy elderge týrısterdi kóptep tartýǵa múmkindik beredi», -degen pikirde Qyrǵyzstandaǵy «Alaman» federatsııasynyń prezıdenti Maqsat Shakıev.
