Elordada qoqystan jasalǵan «Jumbaqtas» paıda boldy
Astanada Býrabaıdyń basty sımvoldarynyń biri sanalatyn Jumbaqtastyń kóshirmesi paıda boldy, dep habarlaıdy Kazinform.
«Jańa adamdar» jastar qozǵalysy bizdiń kıeli jerlerimizge keletin týrıstter qanshama qaldyqtardy qaldyratynyn kórsetý úshin osy art-jobany daıyndaǵan. Belsendiler Býrabaıda qoqystardy jınap, sodan Jumbaqtas tasynyń músinin jasady. Osy art-nysan Qazaqstannyń mádenı murasynyń saqtalýy men tazalyq úshin kúrestiń sımvolyna aınaldy.
Jyl saıyn Býrabaıdyń tabıǵat tamashalaýǵa keletin týrıstterdiń sany jyldam kóbeıip keledi. Kórikti jerdiń tanymaldyǵymen qatar, qoqysynyń da kólemi artpasa azaımaǵan. «Jańa adamdar» jastar qozǵalysynyń múshesi Baýyrjan Amanov talaı tarıhı oqıǵalarǵa kýá bolǵan Jumbaqtasqa jazý jazyp, mańaıyna qaldyq tastap ketetinderge shara qoldaný kerek ekenin aıtady.
«Bizdiń kıeli jerler men mádenı eskertkishterdiń joıylýyna nemquraıdy qaraı almaımyz. Qazaqstandyqtardy tabıǵatymyzdy aıalaýǵa jáne tarıhymyzdy qasterleýge shaqyramyz. Bárin ózimizden bastaıyq. Qoqystardy shashpaı, aınalamyzdy taza ustaıyq. Jerge tastalǵan qoqys sál ýaqyttan keıin aınalany jutyp alýy da múmkin», - deıdi ol.
Eske sala keteıik, «Qoqystas» art-obektisi «Kıeli tabıǵat» eko-senbiligin jáne basqa da kóptegen ekologııalyq bastamany qoldaý maqsatynda uıymdastyrylǵan bolatyn.
