Elordada kógildir otynǵa 1000-ynshy abonent qosyldy
– Jyl saıyn kómir jaǵyp, úıdi jylytatynbyz. Kúnde osylaı shelek - shelek kómir tasydyq. Endi bizge gaz keldi. Gaz mamandaryna myń alǵys. Qazir bul kómirdiń keregi joq, – deıdi Qyzylkól kóshesindegi úıdiń ıesi Qanat Bekibaev.
– Gaz kómirge qaraǵanda áldeqaıda jaqsy. Kúldi shyǵaryp, úıge otyn ákelýdiń qajeti joq. 60 jyldan beri pesh jaǵyp kelemin. Endi bul beınetten qutyldyq, – deıdi Álıma apa ulynyń sózin qostap.
Elordany gazdandyrý jobasy boıynsha Nur-Sultanda gaz taratý jelileriniń qurylysy 2023 jylǵa deıin 3 kezeńge bólingen.
Búginde jalpy uzyndyǵy 413,32 km jelilerdi quraıtyn 1-kezeńdegi qurylystyń 8 iske qosý kesheni (QK) úshin gaz qubyrlary men onyń boıyndaǵy qurylystar paıdalanýǵa berildi. JEO-1, 2, 3-ke gaz qubyrlary tartyldy, Temirjolshylar, Óndiristik, Kóktal-1 turǵyn alaptarynda GTP ornatyldy, Kóktal-2, Óndiristik, Agroqalashyq, Ońtústik-Shyǵys t.a úılerge gaz qubyry tartyldy.
Qazirgi ýaqytta «QazTransGaz Aımaq» AQ tapsyrysymen Internatsıonal, Mıchýrın jáne Kúıgenjar turǵyn alaptarynda 2-kezeńdegi jelilerdiń qurylysy júrgizilýde. Jaqyn arada bul aımaqtarda gazdy iske qosý josparlanýda.
- Murjalar men jeldetý qubyrynyń durys jumys isteýi - qaýipsizdik pen densaýlyqtyń kepili. Óıtkeni, gazdan ýlanýdyń eń kóp oqıǵasy murjanyń tartpaýynan bolady. Sondyqtan murjalardyń talapqa saı bolýyna gaz qurylǵylaryn paıdalanýshylar erekshe muqııat qaraý kerek, - degen «QazTransGaz Aımaq» AQ Astana óndiristik fılıalynyń dırektory Dáýlet Aryqbaev, qaýipsizdik sharalaryn saqtaý qajettigin taǵy bir eske saldy.
Qazirgi ýaqytta Fılıal tutynýshylarǵa gazben jabdyqtaý júıesine qosylý úshin tehnıkalyq sharttardy berýmen aınalysýda.
