Elordada qoǵamnyń sportqa qyzǵýshylyǵy artyp keledi
ASTANA. QazAqparat - Elordada jyl basyndaǵy merekelik demalys kúnderi «Alaý» muz aıdynynda 25 000 adam konkı tepti, dep jazady astana.kz.
Dástúr boıynsha, «Alaý» muz aıdynynda buqaralyq konkı tebý demalys jáne mereke kúnderi ótkiziledi. Táýelsizdik kúni, Jańa jyl jáne Naýryz merekeleri kezindegi uzaq demalys kúnderi konkı tebý marafonǵa ulasady. 2015 jyldyń 2-11 qańtar aralyǵynda da muz aıdynyna jappaı kelý baıqalǵan. Ústimizdegi jyldyń alǵashqy kúnderi aıdynǵa kelgender kóp boldy. 2 qańtarda konkı tebýge 4800 adam kelse, 3 qańtarda kelýshiler sany 5 myńnan asty. Infraqurylymdy keńeıtýdiń arqasynda «Alaý» muz aıdyny kóp adamǵa ońaı qyzmet kórsete alady. Qysqy sport túrleriniń keńinen taralýyna baılanysty qoljetimdilik baǵdarlamasyn keńeıtý úshin muz aıdynynyń ákimshiligi buqaralyq konkı tebýge arnalǵan kúnder sanyn arttyrýdy qarastyryp otyr. Eske sala keteıik, «Alaý» muz aıdynyndaǵy buqaralyq konkı tebý áleýmettik joba bolyp tabylady. Bes jasqa deıingi balalar, zeınetkerler, І jáne ІІ toptaǵy múgedekter úshin kirý tegin. Juma kúnderi stýdentterge jeńildikter jasalady. Tańerteń balalar eki saǵatqa 250 teńge, eresekter 500 teńge tóleıdi.
