Elordada qoǵamdyq orynda mas bolyp júrgen 3,5 myń adam jaýapqa tartyldy
NUR-SULTAN. QazAqparat – Nur-Sultan qalasy aýmaǵynda 7 qyrkúıek pen 1 jeltoqsan aralyǵynda «Ýchaske» jedel-profılaktıkalyq is-sharasy ótkizildi, dep habarlaıdy QazAqparat Nur-Sultan qalalyq Polıtsııa departamentiniń baspasóz qyzmetine silteme jasap.
Іs-shara qyzmet kórsetiletin ákimshilik aýmaqtaǵy tártip buzýshylyqtyń aldyn alý maqsatynda uıymdastyryldy. Sol kezeńde ýchaskelik ınspektorlar kópqabatty úıdiń 280 myń páterin, 85 myńnan asa jekemenshik jáne saıajaı úılerin tekserdi.
Qarýdy tirkeý ýaqyty men saqtaý erejelerin buzǵan 200-den asa turǵyn anyqtaldy. 260-qa jýyq qarý men ıir oıyqty myltyqqa arnalǵan 104 oq tárkilendi.
Nur-Sultan qalasy PD-niń ýaqytsha jaıǵastyrý ornyna turǵylyqty mekenjaıy joq 140 adam ornalastyryldy. Usaq buzaqylyq jasaǵany, qoǵamdyq oryndarda temeki shegip, ata-ananyń qaraýynsyz úıden tys jerde jáne oıyn-saýyq mekemesinde bolǵany úshin 980 kámeletke tolmaǵan bala polıtsııaǵa jetkizildi.
Sondaı-aq túnde ata-ananyń qaraýynsyz qoǵamdyq oryndarda bolǵan 49 bala qıyn jaǵdaıdaǵy balalardy qoldaý ortalyǵyna ornalastyryldy.
Oǵan qosa, 27 myńnan asa azamat túrli tártip buzǵany úshin jaýapqa tartyldy, onyń ishinde 315 otbasy buzaqysy turmystyq qarym-qatynas kezindegi tártipke qaıshy áreketi úshin ustaldy. «Ýchaske» profılaktıkalyq is-sharasy barysynda alkogoldik ishimdik iship, mas kúıde qoǵamdyq oryndarǵa baryp, azamattardyń namysy men ar-ujdanyn qorlaǵany úshin 3,5 myńnan asa qala turǵyny jaýapqa tartyldy.
Profılaktıkalyq is-shara aıasynda turǵyn úı podezderinde ýchaskelik polıtsııa ınspektorynyń baılanys nómiri kórsetilgen QR-kod bar aqparattyq qaǵazdar ilindi. Bul azamattarǵa mobıldi qurylǵy arqyly ýchaskelik polıtsııa pýnktiniń qaıda ekenin jáne basqa da qajetti málimetti alýǵa múmkindik beredi. Sondaı-aq turǵyndardy tártipti saqtaýǵa shaqyrý maqsatynda ýchaskelik ınspektorlar turǵyndar men PIK chatyna qosylyp, profılaktıkalyq sıpattaǵy aqparat taratyp otyrady.
Qazirgi ýaqytta astananyń barlyq ýchaskelik ınspektorlary úı turǵyndarynyń chatyna qosyldy.
