Elordada qoǵamdyq kólikterdiń júrý ýaqyty qysqarady
NUR-SULTAN. QazAqparat – Elordadaǵy qoǵamdyq kólikterdiń qyzmetine jaýapty CTS kompanııasynyń (burynǵy Astana LRT – avt.) basshysy Bekmyrza Igemberdınov erteńnen bastap jolǵa shyǵatyn qoǵamdyq kólikterdiń sany qysqartylatynyn málim etti, dep habarlaıdy QazAqparat tilshisi.
«Qazirgi ýaqytta elordada jolaýshylar aǵynynyń tómendegeni baıqalady. Nur-Sultan qalasynyń ákimi Altaı Kólginov atap ótkendeı keshe jolaýshylardyń azaıý deńgeıi 30 paıyz bolsa, búgin taǵy 10 paıyzǵa tómendep ketti. Osylaısha barlyq baǵdar boıynsha jolaýshylar aǵynynyń 40 paıyzǵa azaıǵany baıqalady», - dedi Bekmyrza Igemberdınov OKQ-da ótken baspasóz máslıhatynda.
CTS kompanııasynyń basshysy elordada karantınniń engizilýine baılanysty erteńnen bastap qoǵamdyq kólikterdiń jumysyna ózgeris engiziletinin aıtyp ótti.
«Atap aıtqanda avtobýstardyń sany qysqartylady. Búgingi kúni Nur-Sultandaǵy jolǵa shyǵatyn avtobýstardyń sany 856 bolsa, olar 676-ǵa deıin azaıady. Barlyq baǵyt-baǵdar boıynsha qysqarý deńgeıi 21 paıyzdy quraıdy. Qalalyq jáne ekspres baǵdarlardaǵy avtobýstardyń sany 20 paıyzǵa, qala mańyna qatynaıtyn avtobýstardyń sany 32 paıyzǵa qysqarady. Sonymen qatar, avtobýstardyń júrý ýaqytyna ózgeris enedi. Erteńnen bastap ekspres baǵdarlar men qala mańyna qatynaıtyn avtobýstar 21.00-ge deıin ǵana júretin bolady», - dedi ol.
