Elordada qoǵamdyq kólikterdiń jolaqysy 90 teńgege deıin kóteriledi
ASTANA. QazAqparat - Búgin astanalyq máslıhatta qoǵamdyq kóliktegi jolaqy tarıfiniń artýy múmkindigi týraly saýal talqyǵa tústi, dep habarlady qala ákimdiginiń resmı saıty.
Ákimdiktiń aqparatyna qaraǵanda, sońǵy 6 jylda janar-jaǵarmaı 2 esege ósip, avtokólikke tehnıkalyq qyzmet kórsetý quny qymbattaǵanda, jolaqy tarıfi bir deńgeıde turaqty ustalǵan. Osylaısha qazirgi tańda tasymaldaýshylar shyǵyndaryn óteı almaýda jáne zııan shegýde.
«Osy máseleni sheshý úshin arnaıy komıssııa quryldy. Barlyq qajetti úderister men esepter júrgizildi. Nátıjesinde qaladaǵy qoǵamdyq kólikte jol júrý quny eresekterge 90 teńge jáne balalarǵa 40 teńge retinde belgilendi»,- dedi Astana qalasy Jolaýshylar kóligi jáne avtomobıl joldary basqarmasynyń tóraǵasy Rashıd Amanjolov.
Basqarma basshysy tarıftyń artýy májbúrli shara ekenin basa aıtty. Alaıda bul ózgeristiń qoǵamdyq kólikte júrýge jeńildigi bar azamattarǵa esh qatysy joq. Jolaýshylar kóligi salasynyń qazirgi jaǵdaıyna toqtala otyryp, vedomstvo basshysy: «Qazirgi ýaqytta jolaýshylar tasymalyn 50 qalalyq marshrýtta 8 kompanııa atqarýda. Onda barlyǵy 890 birlik avtobýs shoǵyrlanǵan. Jelige jańa avtobýstar shyǵarý qajettigi de týyndap otyr. Olar qazirgi kezde baqylanǵan 180 birlik shamasyndaǵy qajettilikti ótemek. Sonymen qatar qazir «Elektrondy bılet» jańa júıesin engizý jobasy ázirlenýde», - dedi.
