Elordada qoǵamdyq kólikke qatysty 80 myńnan asa shaǵym túsken
«2019 jyldyń basynan beri 82 myń shaǵym kelip túsken, onyń ishinde jol júrý kestesin saqtamaý, ekıpajdyń durys emes áreketi, aıaldamadan ótip ketý jáne taǵy basqa kemshilikter aıtylǵan. Bul dınamıka qyrkúıek aıynan beri ósip keledi, biraq 7 aıdyń ishinde eshqandaı ózgeris baıqalmaı otyr. Ótken jyly qoǵamdyq kóliktiń qatysýymen 312 jol-kólik oqıǵasy oryn alyp, odan 372 adam jaraqat aldy. Al bıyl jyl basynan beri 54 jol-kólik oqıǵasy bolyp, saldarynan 88 adam zardap shekti, ókinishke qaraı 2 ólim jaǵdaıy tirkeldi. Ol - ótken aptada oryn alǵan oqıǵa, ony bárińiz bilesizder», - dedi B.Sultanov.
Óz kezeginde Astana LRT kompanııasynyń basshysy Bekmyrza Igenberdınov qoǵamdyq kóliktegi qaýipsizdikti qamtamasyz etý jumystaryna toqtalyp ótti.
«Qoǵamdyq kóliktegi qaýipsizdik máselesi búginde basty nazarda, bul maqsatta arnaıy komıssııa da quryldy. 26 naýryzdan bastap qaladaǵy barlyq avtobýstar tehnıkalyq, al júrgizýshiler medıtsınalyq tekseristen ótýde. Sondaı-aq, avtobýstardyń jol júrý reglamentteri qaıta qaralyp, tıisti usynystar ázirlendi. Atap aıtqanda, avtobýs júrgizýshileriniń medıtsınalyq tekserýden ótý merzimin 1 jyldan 6 aıǵa deıin qysqartý, sol sııaqty qoǵamdyq kólik qaýipsizdigin qamtamasyz etý maqsatynda ústimizdegi jyly túrli baǵyttaǵy 24 is-shara ótkizgeli otyrmyz. Odan bólek, barlyq parktiń avtobýs júrgizýshileri men kondýktorlary týraly personaldy taldaý jasaldy», - dedi ol.
Astana LRT basshysynyń deregine súıensek, búginde qala parkterinde 1156 avtobýs bar, onyń 800-den astamy kúndelikti jelige shyǵady. Odan bólek, 156 avtobýs jóndeýde tur.
Sóz sońynda shahar basshysy quzyrly organdarǵa jol qozǵalysy qaýipsizdigin qamtamasyz etý boıynsha keshendi baǵdarlama ázirleýdi tapsyrdy.
