Elordada qoǵamdyq kólik júrgizýshileriniń jalaqysy ósedi

ASTANA. QazAqparat – Bıyl kúzde elordada avtobýs júrgizýshileriniń jalaqysy 10 paıyzǵa ósedi. Bul týraly Astana qalasy Kólik jáne jol-kólik ınfraqurylymyn damytý basqarmasy basshysy orynbasarynyń mindetin atqarýshy Baýyrjan Taıbergenov aıtty, dep habarlaıdy QazAqparat tilshisi.

«Bizde júrgizýshiler tapshylyǵy erekshe sezilip otyr. Osy máseleni sheshý aıasynda byltyr memlekettik kásiporyndarda olardyń jalaqysyn 20 paıyzǵa ósirdik. Odan keıin jekemenshik parkter de jalaqyny kótere bastady. Bıyl 1 maýsymda biz ony 15 paıyzǵa ósirdik, sondaı-aq aldaǵy qazan-qarasha aılarynda taǵy 10 paıyzǵa kóterýdi josparlap otyrmyz», - dedi B. Taıbergenov Astana qalasy máslıhaty turaqty komıssııasynyń otyrysynda.

Onyń aıtýynsha, qalada qoǵamdyq kólik júrgizýshileriniń tapshylyǵyn joıý úshin jalaqy osylaı kóteriletin bolady.

Budan buryn habarlanǵandaı, Astana turǵyndarynyń 48 paıyzǵa jýyǵy qoǵamdyq kólikpen júredi.

Keıingi jyldary elordada qoǵamdyq kólikti sýbsıdııalaý somasy ósti.